TOShKENT, 20 sen — Sputnik. O‘zbekiston prezidenti Shavkat Mirziyoyev Birlashgan Millatlar Tashkilotiga O‘zbekiston Respublikasining tuhfasi — Registon maydonining maketini topshirdi.
Ushbu eksponat BMT shtab-kvartirasining eng gavjum joylaridan biriga, BMT Xavfsizlik kengashi va Bosh Assambleya zallari o‘rtasidagi foyega o‘rnatildi.
Registon maydonining maketi O‘zbekistonning qo‘li gul usta hunarmandlari tomonidan yasalgan bo‘lib, qimmatbaho metall va go‘zal milliy naqshlar bilan bezatilgan. BMT bosh kotibi o‘rinbosari Jen Bigl shunday go‘zal va teran mazmunga ega tuhfa uchun O‘zbekiston prezidentiga chuqur minnatdorlik bildirdi.
Tadbirda shuningdek, Bosh Assambleya sessiyasiga kelgan diplomatlar, BMT axborot markazi xodimlari qatnashdi, deb xabar bermoqda O‘zbekiston prezidenti matbuot xizmati.
Registon Buyuk ipak yo‘lining markazida joylashgan Samarqand shahrining ramziga aylangan. Majmua 2001-yilda YuNESKOning Jahon merosi ro‘yxatiga kiritilgan.
Registon bugungi kunda ham dunyo sayyohlarini o‘ziga tortmoqda. Bu yerda o‘tkaziladigan "Sharq taronalari" xalqaro musiqa festivali uning dovrug‘i va xalqlar do‘stligidagi ahamiyatini yanada oshirmoqda.
