TOShKENT, 8 noya – Sputnik. Turkiyalik mutaxassis O‘rxan Sivrikaya "O‘zbekiston havo yo‘llari" Milliy aviakompaniyasining strategik rivojlanish bo‘yicha maslahatchisi lavozimini egalladi. Bu haqda MAK axborot xizmati xabar berdi.
Fuqaro aviatsiyasi bo‘yicha turkiyalik maslahatchini jalb qilish masalasi oktabr oyida O‘zbekiston prezidenti boshchiligidagi delegatsiyaning Turkiyaga tashrifi chog‘ida ko‘rib chiqilgandi.
Xabarda aytilishicha, turkiyalik mutaxassis 6-noyabrdan "O‘zbekiston havo yo‘llari"da ish faoliyatini boshlagan. U aviakompaniya rivojlanish strategiyasini ishlab chiqish, reyslar jadvalini muvofiqlashtirish va samolyotlar parkini rejalashtirish, marketing va savdo, axborot texnologiyalarini joriy etish masalalari bilan shug‘ullanadi.
O‘rxan Sivrikaya Turkish Airlines aviakompaniyasi vitse-prezidenti lavozimida faoliyat yuritayotgan edi.
Ilgariroq turkiyalik sobiq deputat Sodiq Badak O‘zbekiston turizmni rivojlantirish davlat qo‘mitasi raisiga maslahatchi etib tayinlangani xabar qilingandi.
