TOShKENT, 10 yanv – Sputnik. “O‘zbekiston temir yo‘llari” AJ 9—13 yanvar kunlari Toshkent—Andijon—Toshkent yo‘nalishida qo‘shimcha reyslarni tashkil etdi. Bu haqda jamiyat matbuot xizmati xabar berdi.
Jamiyat matbuot xizmati xabariga ko‘ra, qo‘shimcha reyslar 9-yanvardan 12-yanvargacha Toshkentdan, 10-yanvardan 13-yanvargacha Andijondan jo‘nab ketadi.
Qo‘shimcha qo‘yilgan poyezdlar qatnov jadvaliga ko‘ra, №560 “Toshkent – Andijon” poyezdi Toshkentdan soat 21:15 da yo‘lga chiqib, Andijonga 03:16 da yetib keladi.
№559 “Andijon – Toshkent” poyezdi Andijondan soat 07:15 da jo‘nab, Toshkentga soat 13:55 da keladi.
Eslatib o‘tamiz, ilgariroq Favqulodda vaziyatlar vazirligi 11—12 va 14-yanvar kuni Qamchiq dovonida bo‘ronli ob-havo kutilayotgani haqida xabar qilgandi.