TOShKENT, 19 mar — Sputnik. Maktabgacha ta’lim muassasalari videokuzatuv moslamalari bilan jihozlanadi. Bu borada maktabgacha ta’lim muassasalarini o‘yinlar, o‘yinchoqlar, mebel, jihozlar va boshqa texnik vositalar bilan jihozlash meyorlari Adliya vazirligida davlat ro‘yxatidan o‘tkazildi. Adliya vazirligining "Huquqiy axborot" kanali xabariga asosan.
Meyorlarga maktabgacha ta’lim muassasalarida bolalarning jismonan sog‘lom, aqliy va intellektual rivojlanishlari uchun lozim bo‘lgan jihozlar, o‘yinlar va o‘yinchoqlar va boshqalar kiritilgan.
Xususan, har bir maktabgacha ta’lim muassasasi hududi, o‘yin maydonchalari internet orqali kuzatish imkoniyatiga ega bo‘lgan video kuzatuv texnikasi bilan jihozlanadi.
Shuningdek, maktabgacha ta’lim muassasalarida bolalarni jismonan sog‘lom rivojlanishi uchun chiniqtirish va yassi oyoqlikni oldini olish uchun yo‘lakchalar, relaksatsion kreslolar, havo tozalagichlar (retsirkulyator), sterilizatorlar, aqliy rivojlanishi uchun "Bank", "Pochta", "Ferma", "Avtomobil turargohi" va boshqa o‘yin markazlari, intellektual rivojlanish uchun ko‘p funksiyali sahnalar, "Tasviriy faoliyat" burchaklari bo‘lishi lozim.
