20:07 08 Aprel 2020
Efir
  • RUB121.10
  • EUR10637.67
  • USD9554.22
Jamiyat
Havola olish
83010

"Ipoteka-bank" xorijga vaqtinchalik mehnat faoliyatini yuritish maqsadida qonuniy tarzda ketish istagini bildirgan fuqarolarni kreditlash mexanizmi haqida maʼlumot berdi

TOSHKENT, 27 apr — Sputnik. Oʻzbekiston prezidentining 2018 yil 5 martda qabul qilingan "Oʻzbekiston Respublikasi fuqarolarining vaqtinchalik mehnat faoliyatini amalga oshirish uchun respublika tashqarisiga transportda chiqish vaqtida xavfsizligini taʼminlash chora-tadbirlari toʻgʻrisida"gi qarorida "Ipoteka bank" tomonidan vaqtinchalik mehnat faoliyatini amalga oshirish uchun respublikadan tashqariga chiqayotgan fuqarolarga 1000 AQSH dollari ekvivalentida kredit ajratish koʻzda tutilgandi.

"Ipoteka-bank" xorijga vaqtinchalik mehnat faoliyatini yuritish maqsadida qonuniy tarzda ketish istagini bildirgan fuqarolarni kreditlash mexanizmi haqida maʼlumot berdi.

Bankning bildirishicha, ushbu loyiha boʻyicha ajratiladigan kreditlar qonuniy tarzda xorijga vaqtinchalik mehnat faoliyatini yuritish maqsadida ketuvchi fuqarolarning quyidagi xarajatlarini toʻlash uchun ajratiladi:

birinchidan, yoʻl-transport xarajatlari, Tashqi mehnat migratsiyasi masalalari agentligi tomonidan tashkil qilinadigan tibbiy koʻrik, qisqa muddatli oʻquv kurslari uchun. Bunda kredit mablagʻlaridan pul oʻtkazish yoʻli bilan Tashqi mehnat migratsiyasi masalalari agentligi hisobvaragʻiga yoki boshqa tegishli tashkilot hisobvaragʻiga oʻtkazib beriladi.

Ikkinchidan, fuqaroning chet davlatda ishga joylashish bilan bogʻliq boʻlgan ishlash uchun xorijiy mamlakatning qonun hujjatlariga muvofiq tegishli ruxsatnoma, tibbiy koʻrik, dastlabki uy-joy ijara toʻlovi va boshqa xarajatlarni (xorijiy valyutada) toʻlash uchun xalqaro toʻlov kartasiga oʻtkaziladi.

"Ipoteka-bank" tomonidan qonuniy tarzda xorijga vaqtinchalik mehnat faoliyatini yuritish maqsadida ketuvchi fuqarolarga imtiyozli kreditlar ariza berilgan sanadagi Oʻzbekiston Respublikasi Markaziy bankining kursi boʻyicha 1000 AQSH dollari ekvivalentigacha boʻlgan miqdorda milliy valyutada ajratiladi.

Kredit boʻyicha yillik foiz toʻlovlari Oʻzbekiston Respublikasi Markaziy bankining qayta moliyalash stavkasi miqdorida belgilangan. Hozirgi kunda bu yillik 14 foizni tashkil qilmoqda.

Mazkur kredit 12 oydan koʻp boʻlmagan muddatga berilib, fuqaro tomonidan dastlabki 3 oy muddat ichida imtiyozli ravishda faqat kredit boʻyicha foizlar toʻlanishi lozim.

Misol uchun, 1000 AQSH dollari ekvivalentida kredit olgan fuqaro birinchi uch oy davomida har oy 11,7 AQSH dollari ekvivalentida kredit boʻyicha foiz toʻlovlarini amalga oshirishi kerak.

Keyingi 9 oy davomida qarzdor tomonidan har oyda 117,7 AQSH dollari ekvivalentida kredit va u boʻyicha foiz toʻlovlarini qaytarishi lozim.

Kredit boʻyicha toʻlovlar qarz olgan fuqaroning xorijdan yuborgan daromadlari hisobidan oila aʼzolari tomonidan amalga oshiriladi.

Taʼkidlanishicha, ushbu kredit vaqtinchalik mehnat faoliyatini yuritish maqsadida xorijga aynan qonuniy tartibda tashkillashtirilgan mehnat migratsiyasi orqali ketadigan fuqarolarga berilishi koʻzda tutilgan.

Xabarda ushbu kredit turini olish istagini bildirgan fuqarolar bankning joylardagi filiallariga ariza, qarz oluvchi va birgalikda qarz oluvchi/toʻlovchi pasporti, kredit taʼminoti boʻyicha taqdim etiladigan hujjatlar va Tashqi mehnat migratsiyasi masalalari agentligi bilan tuzilgan shartnomasidan nusxa taqdim etishlari lozimligi koʻrsatib oʻtilgan.

Asosiy mavzular