TOShKENT, 6 yanv — Sputnik. O‘tgan yilning so‘nggi kunida mudhish fojia sodir bo‘ldi. Magnitogorsk shahrining Karl Marks ko‘chasida maishiy gaz portlashi oqibatida o‘n qavatli uyning podyezdlaridan biri qulab tushdi. Keyinchalik ma’lum bo‘lishicha, bu holat 39 kishining umriga zomin bo‘ldi.
Voqea joyiga qutqaruvchilardan oldin o‘zbekistonlik Olamafruz Abdullayev yetib keldi. U yaqin atrofdagi uylardan birida istiqomat qiladi.
Yigit sakkiz kishiga vayronalar ostidan chiqishga yordam berdi. FVV xodimlariga ko‘maklashdi - vayronalarni tozaladi, yong‘inni o‘chirishga yordam berdi.
O‘zbekistonlik yigit o‘zini qahramon deb hisoblamaydi.
“Bu holatdan keyin o‘zimni yulduz deb hisoblamayman. Musulmonlar ochiq ko‘ngil, bag‘rikeng, boshqa odamlarga yordam berishga harakat qilishadi”, - dedi Olamafruz.
Alamafruz Abdullayev Surxondaryo viloyatida tug‘ilgan. Termezda kollejda tahsil olgan, keyinchalik Rossiyaga kelgan. Bu yerda yetti yildan beri istiqomat qiladi.
“To‘g‘risini aytsam, Rossiya menga yoqadi. Bu yerda ko‘p do‘stlarim, tog‘alarim yashaydi”, - dedi Olamafruz.
Hozircha u Rossiya fuqaroligini olmagan, biroq rejalashtirmoqda.
Biroq Abdullayev o‘z vatanini unutgani yo‘q.
“Men O‘zbekiston fuqarosi bo‘lganligimdan faxrlanaman. O‘z mamlakatimni juda yaxshi ko‘raman”, - deb qo‘shimcha qildi Abdullayev.
Bo‘sh vaqtida esa u “Kudo” kurash sport turi bilan shug‘ullanadi. Chelyabinsk viloyatida uchinchi o‘rinni olgan.
