TAShKENT, 10 apr - Sputnik. Andijonda 2 116 501 AQSh dollarini Qirg‘izistononga olib chiqishga uringan fuqaro to‘xtatib qolindi, deb xabar qilmoqda “O‘zbekiston 24” telekanali.
Ushbu miqdordagi naqd pul DXX maxsus operatsiyasi davomida “Andijon-Qorasuv” yo‘nalishida harakatlanib ketayotgan “Neksiya-3” rusumli avtomobil ichidan topilgan.
Avtomobilni boshqarib ketayotgan Rahmatillo Ahmedov, chegara postlarini chetlab o‘tgan holda, pullarni Qirg‘iziston hududiga yetkazib berishni rejalashtirgan bo‘lgan.
Ayni damda ushbu ish yuzasidan tegishi modda bo‘yicha jinoiy ish qo‘zg‘atilib, tekshiruv olib borilmoqda.
Eslatib o‘tamiz, so‘nggi oy davomida DXX Farg‘ona vodiysi hududida bir necha bor yirik summadagi naqd pullarni O‘zbekiston hududidan olib chiqib ketishni to‘xtatib qoldi.
Xususan, 3-aprel kuni Namangan viloyati hududi 2ta avtomobilda olib chiqib ketilayotgan jami 1,5 milliondan ortiq AQSh dollari to‘xtatib qolingan edi.
