14:54 09 Dekabr 2019
Efir
  • RUB147.79
  • EUR10476.36
  • USD9510.99
Uchitelnitsa sredney shkolы. Arxivnoye foto

Prezident maktablariga hujjatlarning onlayn qabuli qachon boshlanishi maʼlum boʻldi

© Sputnik / Said Tsarnayev
Jamiyat
Havola olish
544510

Prezident maktablari Shavkat Mirziyoyevning 2019-yil 20-fevraldagi qaroriga asosan tashkil etilgan. Mamlakatda iqtidorli yoshlarni oʻqitish tizimini yaratish hamda kelgusida ularda rahbarlik va yetakchilik koʻnikmalarini shakllantirishga qaratilgan.

TOSHKENT, 27 may – Sputnik. Joriy yilning 1-22 iyun kunlari Toshkent, Namangan, Nukus va Xivadagi Prezident maktablarida hujjatlarni qabul jarayoni boʻlib oʻtadi. Mazkur maʼlumot Xalq taʼlimi vazirligi tomonidan eʼlon qilindi.

Maʼlum boʻlishicha, birinchi Prezident maktablari 2019-2020 oʻquv yilida Toshkent, Namangan, Nukus va Xivada ishga tushiriladi.

Nomzodlarga qoʻyilgan talablar:

Prezident maktablariga hujjatlar 2019-yilning 1-iyunidan 22-iyunigacha topshiriladi.  Joriy yilda Namangan, Nukus, Xiva va Toshkentdagi Prezident maktablariga oʻquvchilar 5-10-sinflariga, kelgusi yillardan boshlab esa 5-sinfga qabul qilinadi.

Nomzodlar tugʻilganlik toʻgʻrisidagi guvohnoma, 2018-2019 oʻquv yilidagi tabelining asl nusxasi va nusxasi hamda taʼlim olayotgan maktabidan belgilangan shakldagi maʼlumotnomani taqdim etishi kerak.

Arizachilar ichidan eng maqbulini saralash va arizachilar sonini maqbullashtirish maqsadida hujjat topshirish uchun STEM yoʻnalishi boʻyicha fanlardan aʼlo baho olish talabi joriy eʼtiladi. Yaʼni, 4-sinf bitiruvchilari matematika va tabiatshunoslik kabi fanlardan baholari 5 “aʼlo” boʻlishi kerak. Shuningdek, 5-sinf bitiruvchilari matematika faniga qoʻshimcha tarzda biologiya hamda informatika va axborot texnologiyalari, shu bilan birga 6-sinf bitiruvchilari ham matematika faniga qoʻshimcha biologiya, informatika va axborot texnologiyalari, fizika fanlaridan baholari aʼlo boʻlishi talab etiladi.

7-9-sinflarni bitirgan oʻquvchilar algebra, geometriya, informatika va axborot texnologiyalari, fizika, kimyo va biologiya fanlari boʻyicha baholari 5 "aʼlo" boʻlsagina hujjat topshirishi mumkin.

Hujjatlarni topshirish faqat ariza beruvchining tahsil olayotgan hududi boʻyicha amalga oshiriladi. Arizachi oʻqiyotgan maktabning hududiy joylashuvi Prezident maktabi ochilayotgan hududga mos kelishi kerak. Boshqa viloyatlar maktablarida tahsil olayotgan oʻquvchilar 2020-2021 yillarda respublikamizning boshqa viloyatlarida tashkil etiladigan Prezident maktablariga hujjat topshirishi mumkin.

Hujjatlar qanday topshiriladi?

Aholiga qulaylik yaratish maqsadida nomzodlar Prezident maktablarining pm.xtv.uz. rasmiy saytiga hujjat topshirishlari mumkin. Onlayn qabul 21-iyun kuni soat 24: 00da yakunlanadi.

Bundan tashqari, internetdan foydalanish imkoniyati yoʻq ota-onalarga qulaylik yaratish maqsadida Toshkent, Namangan, Nukus va Xivadagi qabul markazlarida ham hujjatlar qabul qilinadi. Hujjatlarni qabul qilish jarayoni 22-iyun kuni soat 17:00 da yakunlanadi. 17:00 dan boshlab hujjatlar qabul qilinmaydi va koʻrib chiqilmaydi.

Ishonchsiz maʼlumotlar taqdim etgan nomzod tanlovning istalgan bosqichida imtihondan chetlashtirilishi mumkin.

Prezident maktablarida imtihon oʻtkazish tartibi:

Imtihon jarayonlari Namangan, Nukus, Xiva va Toshkentdagi Prezident maktablarida nomzodlar soniga koʻra bir necha bosqichda oʻtkazilishi mumkin. Agar ariza beruvchilar soni bir oʻrin uchun 20 kishidan oshsa, dastlabki imtihonlar matematika fani boʻyicha oʻtkaziladi. Mazkur jarayonda matematika fanidan berilgan 20 ta testni yechishga bir soat vaqt ajratiladi.

Imtihonlarning asosiy bosqichi axborotni tahlil qilish va solishtirish qobiliyatini aniqlash boʻyicha (16 ta masala), mantiq elementlari boʻlgan matematika fanidan (24 ta masala) hamda ingliz tili (55 ta test savoli) fanlaridan iborat boʻladi. Oʻquvchilar toʻplagan ballarning asosiy qismi (80 foizi)ni tanqidiy fikrlash va mantiqiy bilimni talab etuvchi topshiriqlarni bajarish orqali yigʻishlari mumkin. Ballarning faqat 20 foizigina ingliz tili faniga toʻgʻri keladi. Shu bois nomzodlar ingliz tilidan mukammal tayyorgarlikka ega boʻlmay, tanqidiy va mantiqiy fikrlash qobiliyati yaxshi rivojlangan boʻlsa ham, ularning Prezident maktablariga qabul qilinish ehtimoli yuqoriligicha qoladi. Nomzodlar istagiga koʻra ushbu yoʻnalishdagi imtihon savollari ingliz tilida emas, davlat tilida berilishi mumkin.

Prezident maktablariga ingliz tilini yaxshi bilganlar qabul qilinadi

Yuqori sinf oʻquvchilari uchun ingliz tilining ahamiyati qariyb 40 foizdan ziyod boʻlishi kutilmoqda. Sababi ular kelgusida xorijlik oʻqituvchilar oʻtadigan STEAM-fanlarni oʻrganish uchun yetarli salohiyatga ega boʻlishlari zarur. Oʻquvchi xohishiga koʻra tanqidiy fikrlash va mantiq boʻyicha imtihonlarni ingliz tilida ham topshirilishi mumkin.  

Agar talabgorlar bir xil miqdorda ball yigʻsa qabul komissiyasi nomzodlar bilan suhbat oʻtkazadi. Suhbatda oʻquvchining ota-onasi (qonuniy vakillari), zarur hollarda esa, psixolog hamda tibbiyot xodimlari ham ishtirok etishi mumkin. Mazkur jarayonda audio va videotasvirga olishga ruxsat beriladi.

Cambridge Assessment International Education qaroriga koʻra, nomzodlar va ularning ota-onalari imtihon natijalari yuzasidan apellyatsiyaga berish hamda imtihon ishlarini tekshirish huquqiga ega emas.

Oʻquv jarayoni:

Prezident maktablari internat sifatida faoliyat yuritadi. Yaʼni, oʻquvchilarga haftaning 5 kuni mobaynida maktabda oʻqish va yashash imkoni beriladi. Dam olish kunlari ota-onalar farzandlarini uyga olib ketishlari mumkin.

Prezident maktablari oʻquvchilari bepul ovqat va maktab formasi bilan taʼminlanadi.

Prezident maktablaridagi oʻqitish jarayoni “STEAM — taʼlim” (Science — tabiiy fanlar, Technology — texnologiyalar, Engineering — texnik ijodkorlik, Art — sanʼat, Mathematics — matematika) dasturi boʻyicha amalga oshiriladi. Bu esa barkamol avlodning fikrlash qobiliyatini, irodasi, ijodiy salohiyati va kirishuvchanligini yanada rivojlantirish imkonini beradi. Mazkur yoʻnalishdagi darslar ingliz tilida oʻtiladi.

Shuningdek, Prezident maktablarida oʻzbek tilida chuqurlashtirilgan holda olib boriladigan ona tili va adabiyot, tarix va boshqa fanlarga ham alohida ahamiyat qaratiladi.

Prezident maktabida taʼlim jarayoni 9-11-sinf oʻquvchilarining qiziqishlariga koʻra tashkil etiladi.

Prezident maktablari bitiruvchilariga belgilangan tartibda davlat tomonidan tasdiqlangan shahodatnoma, attestat bilan bir qatorda, xalqaro darajadagi tegishli dastur diplomi (International Baccalaureate, Advanced Placement yoki International Advanced Levels)ga ega boʻladi. Bu esa oʻz navbatida xorijiy oliy oʻquv yurtlariga kirish imkonini beradi.

Taʼkidlanishicha, +998 71 2077222 raqamiga qoʻngʻiroq qilish orqali Prezident maktabiga qabul jarayoni haqida maʼlumot olish mumkin.

Prezident maktablariga topshiriladigan hujjatlar quyidagi manzillarda qabul qilinadi:

1.      Toshkent shahri, Mirzo Ulugʻbek tumani, Salom koʻchasi 1, 241-maktab binosi

2.      Namangan shahri, Boborahim Mashrab koʻchasi, Barkamol avlod bolalar markazi

3.      Xiva shahri, Yangiturmush maxallasi, R. Majidiy koʻchasi 12-uy, Xiva shahar xalq taʼlimi boʻlimi

4.      Nukus shahri, Olloyor Doʻstnazarov koʻchasi, Ibrohim Yusupov nomli Davlat ixtisoslashtirilgan maktab internati

Asosiy mavzular