07:39 26 Sentyabr 2020
Efir
  • RUB136.28
  • EUR12210.60
  • USD10315.62
Jamiyat
Havola olish
289 0 0

2019 yil 15 oktyabrdan boshlab umumiy ovqatlanish korxonalari va koʻngilochar obʼyektlar ayrim talablarni bajargandan soʻng tunu kun faoliyat yuritishi mumkin boʻladi.

TOSHKENT, 25 iyul — Sputnik. Tungi vaqtda faoliyat yurituvchi umumiy ovqatlanish korxonalari va koʻngilochar obʼyektlarda jamoat xavfsizligini taʼminlashga doir qoʻshimcha chora-tadbirlar toʻgʻrisidagi Hukumat qarori qabul qilindi.

Qarorga muvofiq, 2019 yil 15 oktyabrdan boshlab umumiy ovqatlanish korxonalari va koʻngilochar obʼyektlar quyidagi talablarni bajargandan soʻng tunu kun faoliyat yuritishi mumkin:

  • koʻrsatilgan obʼyektlarning ichki qismiga, shu jumladan, xizmat koʻrsatish xonalari, kirish va chiqish joylariga tasvirni kamida oʻttiz kun davomida saqlash imkoni boʻlgan videokuzatuv tizimini oʻrnatish;
  • binolarning yon-atrofi, avtoturargoh va boshqa tegishli hududni yetarli darajada (kamida 10 metr masofada) yoritish;
  • binoda shovqin meʼyorlariga qoʻyilgan talablarga amal qilish yoki tungi vaqtda musiqa va tovush kuchaytirgich asboblardan foydalanmaslik;
  • yongʻin oʻchirish vositalari va tibbiy yordam qutichalari bilan taʼminlash;
  • hamma uchun koʻrinarli joylarga evakuatsiya chizmasi hamda tezkor va qutqaruv xizmatlarining telefon raqamlari haqida maʼlumotlar oʻrnatish.

Koʻrsatilgan obʼyektlar rahbari mazkur talablar bajarilgani haqida hududiy ichki ishlar organlariga maʼlumot taqdim etadi.

Talablarga rioya etmagan holda tungi vaqtda faoliyat yuritish taqiqlanadi hamda tegishli tartibda javobgarlikka sabab boʻladi. Talablar doirasida tunda ishlovchi mazkur obʼyektlar faoliyatiga huquqni muhofaza qiluvchi organlar tomonidan aralashish taqiqlanadi.

Ushbu obʼyektlar tomonidan qaror talablari buzilsa yoki jamoatchilik tomonidan muntazam shikoyatlar tushsa tegishli hokimliklar tomonidan ularning tungi vaqtda faoliyat yuritish huquqi bekor qilinishi mumkin.

Tungi vaqtda faoliyat yurituvchi bunday obʼyektlar joylashgan yoʻnalishlarda patrul guruhlari tomonidan doimiy nazorat oʻrnatiladi.

Ushbu qaror rasman eʼlon qilingan kundan eʼtiboran uch oy oʻtgach kuchga kiradi.   

Asosiy mavzular