01:20 23 Sentyabr 2019
Efir
  • RUB146.51
  • EUR10421.13
  • USD9411.30
SMI na press-konferentsii

Jurnalistning faoliyatiga toʻsqinlik qilganlik uchun javobgarlik kiritilishi mumkin

CC BY 2.0 / Estonian Foreign Ministry / Photo: MFA of Lithuania
Jamiyat
Havola olish
106 0 0

Oʻzbekistonda jurnalistning professional faoliyatiga toʻsqinlik qilganlik uchun maʼmuriy javobgarlik kiritilish taklif qilindi. Shuningdek, blogerlarga jurnalistlar kabi huquqlarni berish rejalashtirilmoqda.

TOSHKENT, 4 avg - Sputnik. Oʻzbekiston prezidenti Administratsiyasi huzuridagi Axborot va ommaviy kommunikatsiyalar agentligi (AOKA) jurnalistning professional faoliyatiga toʻsqinlik qilganlik uchun javobgarlik kiritish va blogerlarga jurnalistlar kabi huquqlarni berish koʻzda tutilgan qonun loyihasini jamoatchilik muhokamasiga qoʻydi.

Jurnalistning professional faoliyatiga toʻsqinlik qilish, uning soʻrovi asosida axborotni (hujjatlarni) taqdim etmaslik, oʻz vaqtida taqdim etmaslik yoxud bila turib yolgʻon yoki notoʻgʻri axborot taqdim etishda ifodalanadi. Shuningdek, jurnalistga bosim oʻtkazish, uning jurnalistlik faoliyatiga aralashganlik uchun javobgarlik kiritish rejalashtirilmoqda.

AOKA bunday huquqbuzarlikni sodir etganlarga nisbatan EKIHning 1 baravaridan 3 baravarigacha, mansabdor shaxslarga esa — 5 baravaridan 10 baravarigacha miqdorda jarima solishni taklif qilmoqda.

Betaraflik va ishonchlilik - jurnalistlar kasb etikasi kodeksi eʼlon qilindi

Xuddi shu qonun loyihasi bilan AOKA  blogerlarga jurnalistlar kabi huquqlarni berishni taklif qilmoqda.

“Bloger — xabar va materiallarni toʻplash, tahlil qilish, tahrirlash, tayyorlash va tarqatish bilan shugʻullanuvchi hamda ularni axborotdan foydalanuvchilar tomonidan, shu jumladan, muhokama qilishi uchun Internet jahon axborot tarmogʻidagi oʻz veb-saytiga va (yoki) veb-sayt sahifasiga joylashtiruvchi jismoniy shaxs”, - deyiladi qonun loyihasi matnida.

Blogerlar huquqi“Axborotlashtirish toʻgʻrisida”gi qonunning 12.1-moddasida (“Erkin foydalanishi mumkin boʻlgan axborotni Internet jahon axborot tarmogʻida tarqatish”)  belgilanishi mumkin va ular oʻz faoliyatini amalga oshirishda quyidagi huquqlarga ega:

- maʼlumotlarni toʻplash, tahlil qilish, tahrirlash, tayyorlash va tarqatish;

- axborotni toʻplash, tahlil etish, tahrir qilish, tayyorlash va tarqatish;

- axborot olish uchun davlat organlari, fuqarolarning oʻzini oʻzi boshqarish organlari, jamoat birlashmalari, korxonalar, muassasalar va tashkilotlarga murojaat etish;

- davlat sirlarini yoki qonun bilan qoʻriqlanadigan boshqa sirni istisno etgan holda hujjatlar, materiallar va axborotdan foydalana olish;

- jurnalist surishtiruvi oʻtkazish;

- oʻzi tayyorlagan xabarlar va materiallarni ommaviy axborot vositalari orqali imzosini yoki taxallusini qoʻyib tarqatish, ularda oʻz fikr-mulohazasini ifodalash;

- davlat organlarining ochiq hayʼat majlislarida va ommaviy tadbirlarida ishtirok etish;

- faoliyatini amalga oshirish yuzasidan mansabdor shaxs qabulida boʻlish;

- maʼlumotlarni belgilangan tartibda yozib olish, shu jumladan zarur texnika vositalaridan foydalangan holda yozib olish;

- sudlarning ochiq majlislarida, harbiy harakatlar maydonlarida, tabiiy ofat yuz bergan hududlarda, ommaviy tadbirlarda hozir boʻlish;

- eʼlon qilishga tayyorlangan maʼlumotlarni tekshirish uchun mutaxassislarga murojaat qilish;

- axborot manbai yoki muallifning nomi sir saqlanishini talab qilish;

- bloger taqdim etgan xabarning mazmuni jismoniy va yuridik shaxslar tomonidan buzib eʼlon qilish oqibatida, oʻziga yetkazilgan maʼnaviy zarar va moddiy ziyon qoplanishini sud orqali talab qilish.

Bloger qonun hujjatlari bilan jurnalistlarga berilgan boshqa huquqlardan ham foydalanadi.

Oʻzbekistonda etika normalarini buzgan jurnalistlar javobgarlikka tortiladi

AOKA direktori oʻrinbosari Saida Mirziyoyeva Facebook᾽dagi sahifasida fuqarolarni ushbu loyiha boʻyicha taklif va mulohazalar bildirishga chaqirgan. Taʼkidlanishicha, taklif va mulohazalar hujjat loyihasini takomillashtirish jarayonida oʻrganib chiqiladi va inobatga olinadi.

Asosiy mavzular