TOShKENT, 15 avg — Sputnik. Hindistonning Rajastxon shtati Jaysalmer shahri yaqinidagi dala-o‘quv maydonida bo‘lib o‘tgan “Qo‘shin razvedkasi a’lochilari – 2019” musobaqasida o‘zbekistonlik razvedkachilar sharafli ikkinchi o‘rinni egallashdi. Bu haqda Mudofaa vazirligi xabar qildi.
Birinchi o‘ringa Hindiston jamoasi loyiq deb topildi. Ikkinchi o‘rin Rossiya harbiylariga nasib etdi.
Musobaqada O‘zbekiston, Rossiya, Belarus, Qozog‘iston, Armaniston, Xitoy, Hindiston va Sudanning qo‘shin razvedkachilari jamoalari o‘zaro bellashdi.
Tanlov beshta – “Desant bo‘lib tushish va marsh-brosokni amalga oshirish”, “Mexanik-haydovchilar musobaqasi”, “Razvedkachi so‘qmog‘i”ning kompleks to‘siqlarini yengib o‘tish”, “O‘q otish” va “Razvedka bo‘linmasining vazifani bajarganidan so‘ng yig‘in punktiga chiqishi” bosqichlaridan iborat bo‘ldi.
So‘nggi – beshinchi bosqichda o‘zbekistonlik razvedkachilar yuqori natijalarni ko‘rsatib, qurol-aslahalar va to‘liq jangovar ekipirovkada suvli to‘siqdan suzib o‘tish shartini 13 daqiqayu 22 soniyada bajarib, musobaqa rekordini o‘rnatishdi.
Eslatib o‘tamiz, avvalroq Qozog‘istonning “Otar” bazasi poligonida minomotchilar hisobi o‘rtasida o‘tkazilgan “Artilleriya olovi ustalari” xalqaro tanlovida O‘zbekiston faxrli uchinchi o‘rinni qo‘lga kiritgani xabar qilingan edi.
