TOShKENT, 16 avg — Sputnik. IIV 51-son manzil-koloniyasida mahkumlarning oyligidan ushlab qolinayotgani haqidagi xabarlarga munosabat bildirdi.
Qayd etilishicha, UY JOY QURILIS MChJ bilan tuzilgan pudrat shartnomasiga asosan har oy yakuni bo‘yicha mahkumlarga haqiqatda bajarilgan ish hajmidan hamda tasdiqlangan razrad va bazaviy tarif stavkalaridan kelib chiqib, 800 ming so‘mdan 2,7 mln. so‘mgacha bo‘lgan miqdorda oylik maoshi hisoblanib kelinmoqda.
“Qurilish obyektlarida ishga jalb qilingan mahkumlarga oylik ish haqlari belgilangan tartibda hisoblanib, ularning ish haqidan noqonuniy ravishda ushlanmalar amalga oshirilishiga yo‘l qo‘yilmagan”, - deyiladi rasmiy bayonotda.
Avvalroq ijtimoiy tarmoqlarda 51-son manzil-koloniyasida mahkumlarning oyligidan ushlab qolinayotgani haqida xabarlar tarqalgandi.
