TOShKENT, 31 okt – Sputnik. Fuqarolik jamiyatini rivojlantirish markazi tashkil qilindi. Bu haqida O‘zbekiston prezidentining 30-oktabr kuni imzolangan qarorida aytib o‘tilgan.
Qarorda aytilishiga ko‘ra ushbu Fuqarolik jamiyatini (FJ) rivojlantirish Markazi - kuchli va adolatli fuqarolik jamiyatini qurish hamda ijtimoiy sheriklik va jamoatchilik nazorati mexanizmlari samaradorligini oshirish maqsadida tashkil qilingan.
Asosiy vazifalari
- xalq bilan muloqot holati va rivojlanishini o‘rganish;
- davlat organlari faoliyati ochiqligini tizimli tahlil qilish;
- FJ rivojlantirish sohasida amaliy tadqiqotlar tashkil etish;
- FJ rivojlantirishning milliy modelini takomillashtirish;
- FJ rivojlanishining normativ-huquqiy tartibga solinishini o‘rganish;
- ijtimoiy sheriklik va jamoatchilik nazoratini amalga oshirishni o‘rganish;
- davlat organlarining fuqarolik jamiyati institutlari bilan samarali hamkorligi mexanizmlarini joriy etish yuzasidan takliflar ishlab chiqish;
- raqobatdosh ko‘ppartiyali tizimning rivojlanish darajasini tizimli tahlil qilish,
- FJ institutlarini rivojlantirish, fuqarolar faolligini oshirish;
- ijtimoiy-iqtisodiy rivojlanishda NNT muammolarini tizimli o‘rganish va boshqalar;
Markazga berilgan huquq va imtiyozlar
Markaz nodavlat notijorat tashkiloti shaklidagi yuridik shaxs hisoblanadi;
Markaz direktori - O‘zbekiston prezident huzuridagi Fuqarolik jamiyatini rivojlantirish bo‘yicha maslahat kengashi rahbari o‘rinbosari hisoblanadi;
Markazi va uning hududiy bo‘linmalarining xodimlari umumiy soni 115 nafar bilan cheklanadi;
Markaz xodimlarining maoshlarini belgilashda tarif koeffitsiyentlari ikki baravar oshirilgan miqdorda qo‘llaniladi;
Markaz xodimlarni Toshkent shahri va Toshkent viloyatida doimiy propiska qilish huquqiga ega bo‘lgan davlat tashkilotlari ro‘yxatiga kiritiladi;
Markazni moliyalashtirish manbaalari
- Oliy Majlis huzuridagi NNT va fuqarolik jamiyatining boshqa institutlarini qo‘llab-quvvatlash jamoat fondi;
- Innovatsion rivojlanish vazirligi grantlari;
- Xalqaro moliya va boshqa institutlar, chet el tashkilotlari grantlari;
- Jismoniy va yuridik shaxslarning homiylik xayriyalari;
Qaror matni bilan batafsil O‘zbekiston Respublikasi normativ-huquqiy hujjatlar rasmiy bazasida tanishing.
