TOShKENT, 2 dek — Sputnik. Toshkentda 12ta avtobus yo‘nalishi vaqtincha o‘zgardi. Bu haqda “Toshshahartransxizmat” AJ matbuot xizmati xabar qildi.
Ta’kidlanishicha, bunga Toshkent metropoliteni Yunusobod yo‘nalishining ikkinchi bosqichini qurish ishlari doirasida yer osti o‘tish yo‘li barpo etilishi sabab bo‘lgan.
Ahmad Donish ko‘chasining Yangi shahar ko‘chasi kesishmasi orasidagi (Yunusobod bozori yonida) 3 tomonlama harakatlanish yo‘li hamda Ahmad Donish ko‘chasining (“Uch baqaloq” kafesidan) Yunus ota ko‘chalari kesishmasi orasidagi yo‘llar 2019-yil 12-dekabrga qadar vaqtincha yopiladi.
Mazkur hududlardan o‘tuvchi 5, 52, 60, 72, 82, 91, 96, 97, 140, 149, 152, 190-sonli yo‘nalishlardagi avtobuslarning harakat yo‘li vaqtincha yo‘lovchilarga qulay va xavfsiz bo‘lgan yondosh ko‘chalar orqali o‘tkaziladi.
Xabarda yo‘nalishlarning o‘zgartirilishi munosabati bilan harakat xavfsizligi va yo‘lovchilar tashish qoidalariga qat’iy rioya etish yuzasidan haydovchi va chiptachilar o‘rtasida navbatdan tashqari yo‘riqnomalar o‘tkazilgani qo‘shimcha qilingan.
