11:27 27 Yanvar 2020
Efir
  • RUB155.06
  • EUR10585.77
  • USD9547.05
Jamiyat
Havola olish
54020

Shavkat Mirziyoyev Konstitutsiya qabul qilinganining 27 yilligiga bagʻishlangan tantanali marosimda shaxsni ushlashda majburiy tarzda video tasvirga tushirish tartibini oʻrnatishni taklif qildi.

TOSHKENT, 8 dek — Sputnik. Oʻzbekiston prezidenti Shavkat Mirziyoyev huquqni muhofaza qiluvchi organlar tizimida fuqaroni ushlash vaqtida majburiy tarzda video tasvirga tushirish tartibini joriy etishni topshirdi.

Prezident bu haqda Konstitutsiya qabul qilinganining 27 yilligiga bagʻishlangan tantanali marosimda maʼlum qildi.

Prezident oʻtgan uch yilda jabrlanuvchilar, guvohlar va jinoyat protsessining boshqa ishtirokchilarini himoya qilish tizimi yaratilganini taʼkidladi. Nodavlat sud-ekspertiza tashkilotlari faoliyatiga ruxsat berildi. Tintuv jarayonini, olingan koʻrsatmalarni hodisa sodir boʻlgan joyda tekshirish, tergov eksperimenti kabi protsessual harakatlarni video tasvir orqali qayd etish shartligi qonuniy asosda belgilangan edi.

“Biroq aholi bilan muloqotlar huquq buzilishi xavfi boʻlgan boshqa holatlar boʻyicha ham shunday choralarni qoʻllash zarurligini koʻrsatmoqda. Xususan, shaxsni ushlab turish, unga protsessual huquqlarini tushuntirish kabi jarayonlarni, agar u himoyachidan voz kechsa, bu holatni ham majburiy tarzda video tasvirga tushirish tartibini oʻrnatish zarur”, - dedi prezident.

U ushlangan shaxs maxsus binoga olib kelinganidan keyin bu haqda uning oila aʼzolari darhol xabardor qilinishi kerakligini taʼkidladi. Davlat rahbari buni surishtiruvchi, tergovchi va boshqa vakolatli shaxsning majburiyati sifatida qonunda aniq belgilab qoʻyishni taklif etdi.

“Bundan tashqari, shaxsni ushlab turish va uning huquqini cheklaydigan boshqa protsessual majburlov choralarini qoʻllash holatlarini hisobga olishning elektron tizimiga oʻtish zarur. Bu jarayonda inson omili ishtirokini iloji boricha kamaytirish lozim”, - dedi Mirziyoyev.

Uning soʻzlariga koʻra, kelgusi yildan boshlab prokuror qarori ustidan sudga murojaat qilish tartibi joriy etiladi.

“Shu orqali surishtiruv va dastlabki tergov jarayonida muvozanatni, yaʼni oʻzaro tiyib turish tamoyillarini taʼminlash imkoni yaratiladi. Bunday muhim oʻzgarish ham bizning tajribamizda birinchi marta joriy etilmoqda”, - dedi prezident.

Davlat rahbari ilgari prokuratura idoralari nihoyatda yopiq, nazoratdan xoli bir organi boʻlgani sir emasligini aytdi.

“Buning oqibatida qancha-qancha odamlar nohaq jabr chekkani, adolatsizlikka duchor boʻlgani ham ayni haqiqat. Qanchalik ogʻir va noxush boʻlmasin, biz shu haqiqatni tan olib, bu sohada qonuniylik va adolatni qaror toptirishga kirishdik”, - deya maʼlum qildi Mirziyoyev.

U prokuror qarori ustidan sudga murojaat qilish adolat mezonini mustahkamlashda ulkan qadam boʻlishiga ishonch bildirdi.

Teglar:
Ichki ishlar organi, Oʻzbekiston

Asosiy mavzular