06:56 30 Noyabr 2020
Efir
  • RUB136.69
  • EUR12344.73
  • USD10414.86
Jamiyat
Havola olish
489 0 0

Davlat yetakchilari yangi yil murojaati anʼanasi paydo boʻlganiga 70 yildan oshdi va u xalq mehrini qozonib, shu qadar ommalashdiki, bugungi kunda bu anʼana u yoki bu koʻrinishda mavjud boʻlmagan davlatni tasavvur qilish qiyin.

Oʻzbekiston

Mamlakat prezidenti Shavkat Mirziyoyev oʻz Yangi yil murojaatini millat uchun muhim xabardan boshladi: xalq milliy yuksalishning muhim bosqichiga qadam qoʻyayotganini aytdi.

© Sputnik / Ruslan Krivobok

Ijtimoiy masalalar, mamlakat ichki va tashqi siyosati ham davlat rahbari eʼtiboridan chetda qolmadi. Xususan, ish haqi va aholi real daromadini oshirish, odamlar yashash sharoitini yaxshilash, arzon uy-joylar, taʼlim va tarbiya masalasida boshlangan ishlar davom ettirilishi, aholi salomatligini mustahkamlash, nuroniylar, ayollarga eʼtibor va gʻamxoʻrlik yanada kuchayishi sanab oʻtildi.

"Tinchlik va barqarorlikni, jamiyatimizda oʻzaro hurmat va ahillikni mustahkamlash asosiy vazifamiz boʻlib qoladi. Bu borada dunyo hamjamiyati, avvalo, yon qoʻshnilarimiz bilan samarali hamkorlikni har tomonlama kuchaytiramiz", - dedi Oʻzbekiston rahbari.

Prezident oʻz tabrigi yakunida 2020 yil har bir oila, har qaysi xonadonga  qut-baraka, baxt va omad olib kelishini, barcha ezgu maqsadlar roʻyobga chiqishini, Oʻzbekiston gullab-yashnashini tiladi.

Qozogʻiston

Qozogʻiston prezidenti Kasim-Jomart Tokayev birinchi marta qozogʻistonliklarni Yangi yil bilan tabrikladi.

Qozogʻiston yetakchisi oʻz murojaati avvalida 2019 yil mamlakat uchun tarixiy yil boʻlganini taʼkidladi. Zamonaviy Qozogʻiston asoschisi - Yelbasi Nursulton Nazarbayev boshlab bergan strategik yoʻnalish davom ettirilishini qoʻshimcha qildi. Tokayev, shuningdek, olti oy davomida ijtimoiy sohada oʻz yechimini topgan masalalar haqida gapirdi va "eshituvchi davlat" kontseptsiyasi amala oshirilishi boshlanganini maʼlum qildi.

"Turli fikrlarga qaramay, biz yagona millatmiz. Biz, bizga buyuk ajdodlarimizdan meros qolgan millat birdamligini koʻz qorachigʻidek avaylashimiz darkor", - deya eslatib oʻtdi prezident.

2020 yil uchun rejalar sanab oʻtildi. Qonunchilik, sud va huquq-tartibot sohasida muhim islohotlar amalga oshirilishidan tashqari, davlatchilik mustahkamlanishi uchun muhim sanalarni hashamat va dabdabasiz nishonlash rejalashtirilmoqda. Bular: Konstitutsiyaning 25 yilligi, shoir va faylasuf Abay, buyuk mutafakkir va faylasuf al-Forobiyning yubiley sanalari. Qozogʻiston, shuningdek, Ulugʻ Vatan urushidagi Gʻalabaning 75 yilligini nishonlaydi.

Tokayev oldinga qoʻyilgan maqsadga erishish uchun urinishlarni birlashtirish kerakligini aytib, Qozogʻiston xalqini farovonlikka erishish yoʻlida birlashishga chaqirdi.

Tojikiston

Emomali Rahmon 2019 yil mamlakat uchun muhim yutuqlar davri boʻlganini eʼtirof etdi.

Tojikiston fuqarolarini Yangi yil bilan tabriklar ekan, Emomali Rahmon yurtdoshlarga sogʻlik, farovon hayot, baxt va gullab-yashnashni tiladi. 2019 yil Tojikiston uchun muhim yutuqlar davri boʻldi, dedi davlat rahbari.

Rahmon, shuningdek, chet eldagi vatandoshlarga ham tabrik yoʻlladi.

"Bu yil mamlakat aholisining sayi-harakatlari, yaratuvchanlik ishlari va tashabbuslari misli koʻrilmagan koʻlamga ega boʻldi. Vatanparvarlik kayfiyatidagi xalqimiz esa Vatanimiz yanada farovon boʻlishi va chiroy ochishi uchun yelkama-yelka, gʻayrat bilan mehnat qildi", - dedi Tojikiston prezidenti.

Tojikiston prezidentining soʻzlariga koʻra, respublika erishgan eng katta yutuqlardan biri bu Rogʻun GESining ikkinchi agregati ishga tushirilishi boʻldi.

"Bu energetika sohasidagi ulkan yutuq, Tojikistonning energetika mustaqilligi yoʻlida qoʻyilgan yana bir qadamdir", - deya oʻz murojaatini yakunladi Rahmon.

Qirgʻiziston

Davlat rahbari oʻz Yangi yil murojaatida oʻtgan yilda erishilgan yutuqlar haqida gapirdi.

Qirgʻiziston prezidenti Sooronbay Jeenbekov 2019 yilda mamlakatda muhim voqealar yuz berganini eslatib oʻtdi: regionlar rivojlana boshladi, mamlakatda keng koʻlamli raqamlashtirish ishlari amalga oshirilmoqda, Qirgʻizistonning xalqaro imidji mustahkamlandi. Jeenbekov bu yutuqlar ortida qirgʻizistonliklarning kundalik mehnati va urinishlari yotganini eʼtirof etdi.

Davlat rahbari shuningdek, 2020 yilda yosh avlodga katta eʼtibor qaratilishini aytdi. "Ishonchim komilki, kuchlarimizni birlashtirib, har bir bolaga munosib hayot sharoitlarini yarata olamiz", - dedi prezident.

Shu bois, 2020-yil Qirgʻizistonda regionlarni rivojlantirish, mamlakatni raqamlashtirish va bolalarni qoʻllab-quvvatlash yili, deb eʼlon qilindi.

"Bolalar haqida gʻamxoʻrlik - biz bu hayotda amalga oshirishimiz mumkin boʻlgan eng olijanob ish", deya eslatdi Jeenbekov.

Turkmaniston

Turkmaniston 2020 yilda suveren davlat sifatida mamlakatning doimiy betarafligi 25-yilligini katta tantana bilan nishonlashni rejalashtirgan.

Turkmaniston prezidenti Gurbanguli Berdimuhammedov, farovon kelgan 2019 yil davomida amalga oshirilgan ijtimoiy islohotlarni birma-bir sanab oʻtib, "davlat - inson uchun" shiori ostida poytaxt va regionlarda tibbiyot maskanlari bunyod etilayotganini, xalq salomatligi - davlatning eng asosiy boyligi ekanligini taʼkidladi.

Davlat rahbari shuningdek, betaraf davlat sifatida oʻz tashqi siyosatining asosiy masalalarini aniq belgilab olganligini aytib oʻtdi. Turkmaniston jahonda mustaqil mamlakat sifatidagi rolini kuchaytirib, boshqa davlatlar va xalqaro tashkilotlar bilan oʻzaro munosabatlarini yangi bosqichga chiqarishni maqsad qilgan.

Berdimuhammedov Yangi yil murojaatida 2020 yil Turkmanistonda "Turkmaniston – betaraflik vatani" shiori ostida oʻtishini eʼlon qildi.

Asosiy mavzular