TOShKENT, 20 yanv — Sputnik. Avstraliyaning Gold-Kost shahrida Janubi-Sharqiy Osiyo matematika olimpiadasida (SEAMO X 2020) o‘zbekistonlik o‘quvchilar oltin va bronza medallarni qo‘lga kiritishdi. Bu haqda Xalq ta’limi vazirligi axborot xizmati xabar qildi.
Olimpiada 17-20 yanvar kunlari bo‘lib o‘tgan. Unda davlat va nodavlat maktablarining 1-11-sinf o‘quvchilari ishtirok etishlari mumkin. 2020-yilda 18 ta davlatdan jami 1044ta ishtirokchi qatnashdi.
Ta’kidlanishicha, mazkur xalqaro fan olimpiadasi Singapur davlatining Terri Chyu instituti tomonidan tashkil etilgan.
Jumladan, SEAMO xalqaro matematika olimpiadasida Buxoro viloyatining Qorako‘l Xalqaro maktabi 10- sinf o‘quvchisi Bekzod Nuriddinov oltin medalga sazovor bo‘lgan.
Toshkent vestminstr Xalqaro maktabining 6-sinf o‘quvchisi Horun Saliyev esa bronza medalini qo‘lga kiritgan.
Shuningdek, Xorazm viloyati, Ugranch shahri, 10-maktab o‘quvchisi Shahzoda Jumaboyeva, Toshkent shahri, 91-maktabning 10-sinf o‘quvchisi Yo‘lchiyev Temurbek hamda Namangan viloyati, Mingbuloq tumanidagi 45-maktabning 6-sinf o‘quvchici Sanjarbek G‘ulomjonovga faxriy yorliqlar topshirilgan.