04:45 02 Iyun 2020
Efir
  • RUB121.10
  • EUR10637.67
  • USD9554.22
Jamiyat
Havola olish
COVID-19 umumjahon pandemiyasi (884)
97010

Oʻzbekistonda koronavirusdan toʻliq tuzalganlar soni 2 314 nafarga yetdi. Davolanish koʻrsatkichi 82 foizga yetdi.

TOSHKENT, 18 may — Sputnik. Sputnik Oʻzbekiston tahririyati respublikadagi koronavirus bilan bogʻliq bugungi kun asosiy xabarlarini toʻpladi.

2020 yil 18 may soat 16:00 holatiga koʻra, Oʻzbekistonda koronavirus infektsiyasi qayd etilganlar soni 2779 nafarni tashkil qilmoqda.

Yangi kasallanish holatlarining barchasi oldindan karantinda boʻlgan fuqarolar orasidan aniqlangan.

Davolanish koʻrsatkichi

Bugunning oʻzida 67 nafar (Toshkent 39, Samarqand 21, Namangan 7) bemor tuzalib, sogʻayish koʻrsatkichi 82 foizga koʻtarildi va 2 314 nafar fuqaro koronavirus infektsiyasidan butunlay forigʻ boʻldi.

Ayni paytda qolgan 452 nafar bemorga belgilangan standartlar boʻyicha davo choralari koʻrilmoqda.

13-chi oʻlim

Toshkentda koronavirusga chalingan samarqandlik bemor vafot etdi. Samarqandlik I. (erkak) 14 may kuni ogʻir ahvolda Respublika shoshilinch tibbiy yordam ilmiy markaziga yotqiziladi.

Diagnostik tahlillardan soʻng bemorda “COVID-19” infektsiyasi ham aniqlangan. Shundan keyin bemor Virusologiya ilmiy tekshirish instituti klinikasiga oʻtkazilgan. Bemor uzoq vaqt davomida jigar tsirrozi tashxisi bilan davolanib kelgan. Bundan tashqari, unda semizlik, anemiyaning ogʻir darajasi kabi qator hamroh kasalliklar ham mavjud boʻlgan.

Koʻrsatilgan reanimatsion muolajalarga qaramasdan, bemor yurak qon-tomir va oʻtkir nafas yetishmovchiligidan vafot etgan.

Fuqarolar qabuli tiklandi

Bugundan boshlab Oʻzbekiston TIV Konsullik-huquqiy departamenti tomonidan sanitar-gigiyenik norma talablariga rioya qilgan holda fuqarolar qabuli tiklandi. Qabul amalga oshirilayotgan binoga kirish yoʻlaklari pirometr va antiseptik vositalari bilan taʼminlangan.

Fuqarolar qabuli ijtimoiy masofa (2 metr) saqlangan va shaxsiy himoya vositalaridan (tibbiy niqob, bir martalik qoʻlqop va antiseptik vositalar) foydalangan holda yoʻlga qoʻyiladi.

Ochilgan aeroport va vokzal

Bugundan boshlab Toshkentdan Nukus, Urganch, Termiz shaharlariga aviaqatnovlar (borish va qaytish) hamda Toshkentdan Navoiy, Buxoro, Qarshi shaharlariga “Afrosiyob” tezyurar poyezdi hamda Fargʻona vodiysiga temir yoʻl qatnovi qisman tiklandi.

Yoʻlovchilar sanitariya qoidalariga qatʼiy rioya qilishi talab etiladi: himoya niqobi va qoʻlqopda boʻlishi zarur, kirish qismida dezinfektsiyadan oʻtkaziladi.

Dastlab yoʻlovchilardan "COVID-19"ga test tahlili olinganligi haqidagi maʼlumotnoma talab etilgandi. Keyinchalik Respublika maxsus komissiyasi tomonidan ushbu talab bekor qilindi.

Test narxi

Oʻzbekistonda samolyot va poyezd yoʻlovchilari uchun COVID-19ga test topshirish joyi va narxi maʼlum qilindi.

Bosh davlat sanitariya inspektori Nurmat Otabekov soʻzlariga koʻra, tibbiyot muassasalarida koronavirusga test tekshiruvi bepul amalga oshiriladi. Biroq tiklanayotgan avia va temir yoʻl qatnovi yoʻlovchilari uchun boshqa vaqtinchalik tartib mavjud.

"Sanitariya-epidemiologik osoyishtalik agentligi farmoniga muvofiq, yoʻlovchilar laboratoriya tekshiruvlari pullik asosda oʻtkaziladi. Bitta tahlilning narxi 224 ming soʻmni tashkil etadi. Tekshiruv Toshkentda Respublika OITSga qarshi kurash markazida, Qoraqalpogʻiston va mintaqalarda sanitariya-epidemiologik osoyishtalik markazlarida oʻtkaziladi”, - dedi Nurmat Otabekov.

Shuningdek, Nurmat Otabekov Uchtepa tumanidagi 62-sonli oilaviy poliklinika karantinga yopilganini maʼlum qildi. Karantindagi fuqaro Uchtepa tumanidagi poliklinikaga kelgan. Oʻsha kuni navbatchilikda boʻlgan 11 nafar shifokor karantin hududiga yuborilgan.

"Gruz-200" 

Bosh davlat sanitariya inspektori Nurmat Otabekov Rossiyada koronavirusdan vafot etgan Oʻzbekiston fuqarosini olib kelish va dafn qilish jarayoni qanday amalga oshirilishini tushuntirdi. Bu masalada fuqarolar kimga murojaat qilishlari kerakligini aytdi.

  • COVID-19 kasalligi bilan roʻyxatga olingan yoki gumon qilinib, vafot etgan bemorlar jasadi tegishli patanatomiya boʻlimi yoki Respublika sud-tibbiy ekspertiza ilmiy markazi va uning hududiy filiallariga qarashli jasad tashiydigan maxsus transport vositasida epidemiyaga qarshi barcha chora-tadbirlarga rioya qilgan holda tashiladi;
  • patanatomiya boʻlimi sud-tibbiy ekspertiza ilmiy markazi va uning hududiy filiallari, shuningdek, chet davlatlardan havo yoʻllari va avtomobil yoʻli orqali COVID-19 kasalligi bilan roʻyxatga olingan yoki gumon qilinib, vafot etgan bemorlar tobuti uyga olib borilmasdan, toʻgʻridan-toʻgʻri qabristonga olib borilib, dafn etiladi;
  • mayitni kutib olish va qabristonga yetkazish tadbirlari alohida ajratilgan maxsus avtotransport vositasi yordamida amalga oshiriladi;
  • mayitni maxsus transport vositasida olib borilmasdan, yaqinlari va qarindosh-urugʻlariga berib yuborish qatʼiyan man etiladi;
  • shaxsi aniqlanmagan va qarindoshlari tomonidan olib ketilishi rad etilgan jasadlar alohida ajratilgan qabristonga yuqorida qayd etilgan barcha qoidalarga rioya etgan holda dafn etiladi.

Dunyo va "Tojdor dushman"

COVID-19 dunyoning 188 davlatiga yetib bordi. BSSTning soʻnggi maʼlumotlariga koʻra, dunyoda yangi koronavirus infektsiyasini yuqtirib olgan kishilarning soni 4,5 milliondan oshdi, 307 ming kishi vafot etdi.

Mavzu:
COVID-19 umumjahon pandemiyasi (884)

Asosiy mavzular