13:23 26 Sentyabr 2020
Efir
  • RUB136.28
  • EUR12210.60
  • USD10315.62
Jamiyat
Havola olish
158 0 0

Oʻzbekiston prezidenti aholi, umumiy ovqatlanish, savdo va xizmat koʻrsatish sohasidagi tadbirkorlik subʼyektlarini qoʻllab-quvvatlash boʻyicha qoʻshimcha chora-tadbirlar toʻgʻrisidagi farmonga imzo chekdi.

TOSHKENT, 21 iyul — Sputnik. Shavkat Mirziyoyev 20 iyul kuni koronavirus pandemiyasining salbiy taʼsirini kamaytirish uchun aholi, umumiy ovqatlanish, savdo va xizmat koʻrsatish sohasidagi tadbirkorlik subʼyektlarini qoʻllab-quvvatlash boʻyicha qoʻshimcha chora-tadbirlar toʻgʻrisidagi farmonga imzo chekdi.

Farmon bilan 2020 yil 1 iyuldan 2020 yil 31 dekabrga qadar:

  • umumiy ovqatlanish korxonalari va binolarni ijaraga berishga ixtisoslashgan korxonalar aylanmadan olinadigan soliqni toʻlashdan ozod etiladi;
  • jismoniy shaxslar koʻchmas mulkni ijaraga berishdan olingan daromadlar boʻyicha jismoniy shaxslardan olinadigan daromad soligʻi toʻlashdan ozod etiladi;
  • mol-mulkini (binolar va avtomobil transporti) ijaraga beruvchi jismoniy shaxslarga soliq maqsadida ijara toʻlovlarining eng kam stavkalarini qoʻllash tartibi toʻxtatib turiladi;
  • ijaraga beruvchilarga 2020 yil uchun ijara toʻlovi miqdorini pasaytirish maqsadida, shu jumladan, taqdim etilayotgan soliq imtiyozlarini inobatga olgan holda ijara toʻlovini qayta koʻrib chiqish tavsiya etiladi.

2020 yil 1 apreldan 2020 yil 31 dekabrga qadar umumiy ovqatlanish korxonalari alkogol mahsulotlari bilan chakana savdo qilish huquqi uchun yigʻimni toʻlashdan ozod qilinadi.

PF–5969-son farmonda belgilangan alkogol mahsulotlarining ulgurji savdosi bilan shugʻullanuvchi korxonalarning ajratmalari miqdorini 5 foizdan 3 foizga pasaytirishga doir imtiyoz muddati 2020 yil 31 dekabrga qadar uzaytiriladi.

Umumiy ovqatlanish korxonalariga alkogol mahsulotlarini yetkazib berish orqali sotish huquqi beriladi.

2020 yil 1 iyuldan boshlab umumiy ovqatlanish korxonalari uchun belgilangan xodimlarning yillik oʻrtacha soni 25 nafardan 50 nafarga oshiriladi.

2020 yil 31 dekabrga qadar prezidentning 18 maydagi prezident farmoni bilan belgilangan soliq imtiyozlari va preferentsiyalarning amal qilinish muddati uzaytiriladi. Jumladan kichik tadbirkorlik subʼyektlari, bozorlar va savdo majmualari, kinoteatrlar, umumiy ovqatlanish joylari, jamoat transportlari tashkilotlari, sport-sogʻlomlashtirish muassasalari, shuningdek, yoʻlovchilarni tashish, maishiy xizmat koʻrsatish, yopiq joylarni ijaraga berish, shu jumladan banketlar tashkil etish bilan shugʻullanadigan yuridik shaxslar mol-mulk va yer soligʻi toʻlashdan ozod qilinadi.

Mikrofirmalar va kichik korxonalar uchun ijtimoiy soliq stavkasi 12 foizdan 1 foizga pasaytiriladi. Ustav fondida (ustav kapitalida) davlat ulushi 50 foiz va undan ortiq boʻlgan davlat korxonalari va yuridik shaxslar bundan mustasno.

Tadbirkorlar uchun tovarlarni (ishlarni, xizmatlarni)ni olib kirishda (import) qoʻshilgan qiymat soligʻini toʻlashni 120 kungacha kechiktirish huquqi beriladi.

Mikrofirma va kichik korxonalarda 2020 yil 15 may holatiga soliqlar, penyalar va soliq qonunchiligini buzganlik uchun hisoblangan jarimalar boʻyicha mavjud boʻlgan qarzdorlikni undirish toʻxtatiladi.

Bundan tashqari, Oʻzbekiston “Mahalla” xayriya jamoat fondiga, “Saxovat va koʻmak” fondiga, “Oʻzbekiston mehr-shafqat va salomatlik” fondiga, shu jumladan ularning Qoraqalpogʻiston Respublikasi, viloyatlar, Toshkent shahri, tumanlar va shaharlardagi boʻlinmalariga begʻaraz beriladigan tovarlar (xizmatlar) qoʻshilgan qiymat soligʻi, aylanmadan olinadigan soliq va jismoniy shaxslarning daromad soligʻi boʻyicha imtiyozlar 2020 yilning 31 dekabriga qadar uzaytiriladi.

14 yoshgacha bolalari boʻlgan oilalar nafaqasi, shuningdek, ikki yoshgacha boʻlgan bola parvarishi boʻyicha nafaqalarga jismoniy shaxslar daromadlariga soliq hisoblashda umumiy daromad sifatida qaralmaydi.

Asosiy mavzular