21:42 20 Oktyabr 2020
Efir
  • RUB133.19
  • EUR12153.63
  • USD10371.76
Jamiyat
Havola olish
324 0 0

Rasmiy maʼlumotlarga koʻra, Toshkent shahrida joriy yilning sakkiz oyi davomida ayollarga 966ta himoya orderi berilgan. Ayollar koʻpdan-koʻp holatlarda oiladagi zoʻravonlik: kaltaklanish, tahqirlanish holatlariga chek qoʻya olmaydilar va zoʻravon bilan hayot kechirishda davom etadilar.

Oʻzbekistonda realibitatsiya va moslashtirish markazlari tashkil etilgach, zoʻravonlik qurbonlariga aylangan ayollar uchun tunu-kun ishlaydigan 1146 qisqa raqami ishga tushirilgach, oʻzbek ayollariga xos jurʼatsizlik sekin-asta chekina boshladi. Ayollar orasida tahqirlanishga rozi boʻlmaydiganlari oʻzida kuch topib, ayollar shelterlariga yordam soʻrab murojaat qila boshladilar.

Hayotda ruhiy va jismoniy zoʻravonliklarga uchrab, Toshkentdagi reabilitatsiya va moslashtirish markaziga kelgan ayollar Sputnik Oʻzbekiston muxbiriga oʻz boshidan kechirgan voqealarni soʻzlab bershdi.

Dildora, 28 yoshda: uch oy intim hayotdan soʻng, med-ekspertiza qizning bokiraligi haqida xulosa berdi

Mana ikki oydirki, u poytaxtdagi realibitatsiya va markazlashtirish markazida yashab kelmoqda. Hayotida yuz bergan ayrim noxush holatlar sabab u oʻzi tugʻilib oʻsgan qishlogʻiga qaytib borishni istamaydi. 

Yosh boʻlishiga qaramasdan Dildora oʻz qishlogʻida tikuvchilik tsexi ochib, tadbirkorlik faoliyati bilan shugʻullana boshladi. Shunday kunlarning birida u tsexga mijoz sifatida kirib kelgan harbiy yigit bilan tanishib qoldi. Bora- bora ularning munosabatlari muhabbatga, keyinchalik muhabbat chegarasi buzilib, munosabatlar pinhoniy intim aloqalargacha borib yetadi. Onasi Dildoraning ishqiy munosabatlaridan xabar topgach, qiziga toʻgʻri yoʻl koʻrsatish oʻrniga, yigitni mahkam ushlashi kerakligini aytdi va bir necha marotaba oʻz uyida uchrashishlari uchun ikkisiga sharoit yaratib berdi. Onaning  maqsadi yigitni qanday qilib boʻlsada ichkuyov qilib olish edi.  Ammo yigit oilada yolgʻiz farzandligi bois ushbu taklifga na u va na uning oila aʼzolari rozi boʻlmadi.

Shundan soʻng yigit qiz bilan munosabatlariga nuqta qoʻymoqchi boʻlib, boshqa qizga unashtirilganligi haqida aytdi. Bunga  chidolmay qiz oʻz joniga qasd qildi, ammo taqdir izmi bilan u tirik qoladi. Onasi qizninig zoʻrlanganligini iddao qilib, tuman va viloyat prokuraturalariga murojaat qildi. Yigit va qiz oʻrtasida yuz bergan holat boʻyicha jinoiy ish ochildi, ammo ekspertiza qizning qizlik pardasi elastik holatda boʻlganligi bois uning bokiraligi saqlab qolingani haqida xulosa beradi. Bunday javobni kutmagan qizning onasi “qizimga uylanasan” deya yigitning mahallasiga janjal koʻtarib bordi. Boʻlib oʻtgan gap soʻzlar oqibatida yigit ham, qiz ham koʻcha-koʻyda bosh koʻtarolmay qoldi. Tabiiyki, yigitning oila aʼzolari ham Dildorani kelin qilishni istashmadi. Yigit esa Dildoradan butunlay voz kechdi.

"Oyogʻimni oʻpasan": Toshkent shahrida kelinlarga quldek munosabat ommalashgan >>>

Ayni paytda qizning alamzada onasi qanday qilib boʻlsada yigitni ishsiz qoldirish niyatida. Qiz esa huquqiy va ruhiy yordam berishlarini soʻrab, poytaxtdagi realibitatsiya markaziga murojaat qilib keldi. Ayni paytda psixologlar yordamida Dildora oʻz ruhiy holatini tiklashga harakat qilmoqda. Biroq, uning huquqiy muammosi ochiqligicha qolyapti...

Malika, 26 yoshda: eri begona ayol bilan yalangʻoch gaplashib oʻtirganini koʻrib, ajrashishga qaror qildi

Singlisi turmushga chiqqach, ularning oilasida moliyaviy yetishmovchiliklar yuzaga kela boshladi. Onasi avtohalokatga uchraganligi bois u havo almashtirishi kerak edi. Shu bois xolasi uni onasi bilan birga Turkiyaga chaqirdi. Ona-bola havo almashtirish va moddiy ahvolini yaxshilashni maqsad qilib, Turkiyaga uchib ketishdi. Restoranda oshpaz sifatida oʻz ishini boshlagan Malika u yerda asli qoʻqonlik boʻlgan Abror ismli yigit bilan tanishdi va yoshlar ahdu-paymon qilib, oila qurishga qaror qilishdi. Hujjatlarining amal qilish muddati tugagach, yigit Oʻzbekistonga qaytdi. Bir ozdan soʻng Malika ham Abrorning ortidan Oʻzbekistonga qaytdi va oʻzaro kelishib, kichikroq boʻlsada toʻy qilib, birga yashay boshlashdi. Malika homilador boʻlgach, Abror toʻsatdan oʻzgarib qoldi. Bir oz vaqtdan soʻng Malika uning avval boshqa ayol bilan yashaganligi, hatto hozirgacha ularning ishqiy munosabatlari saqlanib qolganligidan xabar topdi. Malika janjal koʻtarmadi, avvaliga oʻzida kuch topib Abrorning harakatlarini kuzata boshladi. Shunday kunlarning birida u erining telefon video-chaqiruvi orqali oʻsha ayol bilan yalangʻoch holda suhbatlashib oʻtirganligiga guvoh boʻldi. Rashk oʻtida yongan Malika eri bilan qattiq janjallashdi.

Eri uni tomogʻidan boʻgʻib, "oʻldirib yuborishi, hech kimi yoʻqligi bois oʻligini hech kim topa olmasligi" bilan qoʻrqitib, Malikaga tazyiq oʻtkazdi. Soʻng xotinini oʻz pushti kamaridan boʻlgan bolani oldirishga majburlay boshladi. Malika rozi boʻlmadi, oradan vaqt oʻtib, u oʻgʻil farzand koʻrdi. Ammo Abror farzanddan ham Malikadan ham voz kechdi. Moliyaviy qiyinchiliklar va ruhiy tushkunlikka tushib qolgan Malika farzandini bolalar uyiga topshirmoqchi ham boʻldi. Ammo uchastka noziri ayolning qiyin vaziyatdaligini koʻrib, uni huquq himoyasiga oldi, ayolga ruhiy dalda berdi. Soʻng uni bolasi bilan Toshkentdagi realibitatsiya va moslashtirish markaziga keltirib joylashtirdi. Bu yerda bir oz muddat yashab, ruhiy tomonlama oʻzini tiklab olgach Malika oʻz oldiga yangi maqsadlar qoʻydi.

Endi u hayot sinovlariga taslim boʻlmay, aksincha yangi orzu va maqsadlar sari intilishga tayyor ekanligini aytadi...

Risolat opa, 56 yoshda: mol-mulk uchun urib, burnini sindirishdi

Asli toshkentlik boʻlgan Risolat opa 56 yoshda, u poytaxtdagi nomdor kasalxonalarning birida farrosh boʻlib ishlaydi. Kech turmush qurganligi uchunmi yoki boshqa sabab, Risolat opa farzandli boʻlolmadi va turmushidan ajralishga majbur boʻldi.

Kamiga ota hovlisiga qaytgach u yerga ham sigʻmadi, ilk kundayoq akasi va yangasi uni qovoq solib kutib olishdi. Keyinchalik, arzimagan bahona-yu sabablar bilan janjal chiqarib, Risolat opaga tinchlik bermaydigan odat chiqarishdi.

Oʻzini himoya qilishga uringanida esa Risolat opa butun boshli oilaning kaltagi ostida qolib ketdi. Uchastka noziri, mahalla oqsoqollari ham bu oilaning mash-mashasidan bezib, Risolat opaning qoʻngʻiroqlariga javob bermay qoʻyishdi. Risolat opa uchun bu ota hovli doʻzaxning oʻzginasiga aylandi. Oxirgi marotaba boʻlgan katta janjalda oʻz jiyani tomonidan kaltaklanib, burni singach, ayol ruhiy va jismoniy zoʻrliklardan panoh istab reabilitatsiya va moslashtirish markaziga qochib keldi. Ayni damda ushbu maskanda ayolga ruhiy yordam koʻrsatilib, uning huquqiy muammolariga yechim izlanmoqda.

Asosiy mavzular