19:12 21 Oktyabr 2020
Efir
  • RUB133.19
  • EUR12153.63
  • USD10371.76
Jamiyat
Havola olish
27511

Qonun bilan professional taʼlim boshlangʻich, oʻrta va oʻrta maxsus professional taʼlim darajalariga ajratiladi.

TOSHKENT, 24 sen — Sputnik. “Taʼlim toʻgʻrisida”gi qonun Oʻzbekiston prezidenti Shavkat Mirziyoyev tomonidan imzolandi.

Qonunga muvofiq, taʼlim turlari quyidagilardan iborat: maktabgacha taʼlim va tarbiya; umumiy oʻrta va oʻrta maxsus taʼlim; professional taʼlim; oliy taʼlim; oliy taʼlimdan keyingi taʼlim; kadrlarni qayta tayyorlash va ularning malakasini oshirish; maktabdan tashqari taʼlim.

Umumiy oʻrta taʼlim I–XI sinflarni oʻz ichiga oladi.

Oʻrta maxsus taʼlim akademik litseylarda 9 yillik tayanch oʻrta taʼlim asosida 2 yil mobaynida amalga oshiriladi.

Professional taʼlim boshlangʻich, oʻrta va oʻrta maxsus professional taʼlim darajalariga ajratiladi.

Boshlangʻich professional taʼlim kasb-hunar maktablarida IX sinf bitiruvchilari negizida kunduzgi taʼlim shaklida 2 yillik integratsiyalashgan dastur asosida bepul amalga oshiriladi.

Oʻrta professional taʼlim kollejlarda davlat buyurtmasi yoki toʻlov-shartnoma asosida davomiyligi 2 yilgacha boʻlgan kunduzgi, kechki va sirtqi taʼlim shakllari boʻyicha amalga oshiriladi.

Oʻrta maxsus professional taʼlim texnikumlarda davlat buyurtmasi yoki toʻlov-shartnoma asosida davomiyligi kamida 2 yil boʻlgan kunduzgi, kechki va sirtqi taʼlim shakllari boʻyicha amalga oshiriladi.

Qonunga koʻra, davlat oliy taʼlim, oʻrta maxsus, professional taʼlim muassasalari va ularning filiallari, shuningdek davlat ishtirokidagi oliy, oʻrta maxsus, professional taʼlim tashkilotlari va ularning filiallari prezident yoki Hukumat qarorlari bilan tashkil etiladi.

Nodavlat taʼlim muassasalarini tashkil etish ularning taʼsischilari tomonidan amalga oshiriladi.

Nodavlat taʼlim tashkilotlariga litsenziya Taʼlim sifatini nazorat qilish davlat inspektsiyasi tomonidan beriladi.

Shuningdek, mazkur qonun bilan,1997 yil 29 avgustdagi “Taʼlim toʻgʻrisida”gi hamda “Kadrlar tayyorlash milliy dasturi toʻgʻrisida”gi qonunlar oʻz kuchini yoʻqotdi.

Ushbu qonun rasmiy eʼlon qilingan kundan eʼtiboran kuchga kiradi.

Asosiy mavzular