16:14 04 Dekabr 2020
Efir
  • RUB137.48
  • EUR12473.23
  • USD10427.38
Jamiyat
Havola olish
117 0 0

Yozuvchilar uyushmasi Oʻzbekiston xalq shoiri Omon Matjon 77 yoshida Toshkent shahrida vafot etganini xabar qildi.

TOSHKENT, 29 okt — Sputnik. 2020 yilning 28 oktyabridan 29 oktyabriga oʻtar kechasi Oʻzbekiston xalq shoiri, Oʻzbekiston Yozuvchilar uyushmasi aʼzosi Omon Matjon 77 yoshida Toshkent shahrida vafot etdi. Bu haqda Yozuvchilar uyushmasi axborot xizmati xabar qildi.

Omon Matjon 1943 yili Xorazm viloyatining Gurlan tumanida tavallud topgan. Oʻrta maktabni tugatgach, Samarqand davlat universitetida tahsil oldi. 1969-2002-yillar mobaynida Gʻafur Gʻulom nomidagi Adabiyot va sanʼat nashriyotida muharrir, boʻlim boshligʻi, “Yoshlik” jurnalida bosh muharrir, “Choʻlpon” nashriyotida direktor boʻlib ishladi.

Shoirning yigirmaga yaqin sheʼriy toʻplami, “Toʻrabekaxonim” nasriy qissasi va “Najmiddin Kubro”, “Ardaxiva”  badialari chop qilingan.

Bu toʻplamlardagi “Amu”, “Oybek”, “Shuʼlalardan hayratlanish”, “Ona degan soʻz”, “Turnalar”, “Mezon”, “Chorlov”, “Oʻn uchinchi eshik”, “Umrimiz haqida” kabi sheʼrlari hozirgi oʻzbek sheʼriyatining eng yaxshi namunalaridan sanaladi.

Omon Matjon ijodida “Choʻldagilar” doston xronikasi, “Gaplashadigan vaqtlar” sheʼriy qissasi alohida oʻrin egallaydi. Ular oʻzining yangicha shakli, ohangi bilan kitobxon eʼtiborini tortadi.

Shoirning 2000 yili “Avesto”ning 2700 yilligiga bagʻishlangan “Ardaxiva” asari chop etildi. 

Omon Matjon qardosh va chet el adabiyotidan koʻplab namunalarni oʻzbek tiliga mahorat bilan oʻgirgan. Xususan, F.Shiller, SH.Bodler kabi jahon klassiklari, YE.Yevtushenko, R.Hamzatov, SH.Petefi, YU.Martsinkyavichyus, B.Kerboboyev, Suxrob Tohir, I.Yusupov singari shoir va adiblar ijodidan qilgan tarjimalari eʼtiborga loyiq.

Oʻzbekiston xalq shoiri Omon Matjon adabiyot rivoji yoʻlidagi xizmatlari uchun  davlat mukofotiga sazovor boʻlgan.

Asosiy mavzular