18:17 20 Yanvar 2021
Efir
  • RUB142.66
  • EUR12682.88
  • USD10500.81
Jamiyat
Havola olish
27410

Ikki chorak davomida masofaviy taʼlim olish jarayonida oʻquvchilarning darslarni toʻliq oʻzlashtirishlariga yetarli imkoniyat bermagan, nazorat sustligi oqibatida voyaga yetmaganlar oʻrtasida huquqbuzarlik holatlari ham kuzatilgan.

TOSHKENT, 10 yanv - Sputnik. Oʻzbekistonda III chorakdan barcha maktablarda oʻquv jarayonlari toʻliq anʼanaviy shaklga oʻtkaziladi, deb xabar bermoqda Xalq taʼlimi vazirligi matbuot-xizmati.

Eslatib oʻtamiz, 2020-2021 oʻquv yilining birinchi yarim yilligida oʻquv jarayoni mamlakatdagi epidemiologik vaziyatni inobatga olgan holda, ota-onalarning ixtiyoriga koʻra anʼanaviy va masofaviy shaklda olib borildi.

"Xalq taʼlimi vazirligi Oʻzbekistonda epidemiologik vaziyat barqarorlashgani, ikkinchi chorak yakuniga qadar 90 foizdan ortiq oʻquvchilar anʼanaviy shaklda taʼlim olish maqsadida maktabga qaytganini inobatga olib, 2021 yilning 11 yanvaridan (III chorak) barcha maktablarda oʻquv jarayonlari toʻliq anʼanaviy shaklga oʻtkazilishini maʼlum qiladi", - deyiladi xabarda.

Aytish joizki, oʻquvchilarning sogʻligini himoyalash boʻyicha oʻz vaqtida koʻrilgan choralar natijasida oʻquv yilining birinchi yarim yilligi davomida anʼanaviy shaklda taʼlim jarayoni yoʻlga qoʻyilgan maktablarda epidemiologik vaziyatning barqarorligi taʼminlandi.

Tahlillar shuni koʻrsatmoqdaki, ikki chorak davomida masofaviy taʼlim olish jarayonida oʻquvchilarning darslarni toʻliq oʻzlashtirishlariga yetarli imkoniyat bermagan, ayrim holatlarda oʻquvchilar televizion darslarni koʻrish va oʻrganish oʻrniga vaqtini besamar oʻtkazish va ota-onalar tomonidan yetarli nazorat etilmasligi oqibatida voyaga yetmaganlar oʻrtasida huquqbuzarlik holatlari ham kuzatilgan.

Shu bois, vazirlik ota-onalardan farzandlarining kelajagi uchun oʻz vaqtida bilim olishlariga sharoit yaratishlari va maktabga yuborishlarini soʻrab qolgan.

Oʻz oʻrnida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari barcha umumtaʼlim maktablarida qishki mavsumda issiqlik tizimini barqaror ishlashi, oʻquvchilarning sogʻligini himoyalash bilan bogʻliq tashkiliy choralarni koʻrish, sanitariya-gigiyena va dezinfektsiya vositalari bilan taʼminlashlari talab etiladi.

Asosiy mavzular