TOShKENT, 13 apr — Sputnik. Ko‘rgazmada butun O‘zbekistondagi viloyatlar va Ozarbayjon, Belgiya, Buyuk Britaniya, Germaniya, Misr, Isroil, Hindiston, Ispaniya, Eron, Italiya, Qozog‘iston, Xitoy, Koreya, Qirg‘iziston, Quvayt, Latviya, Malayziya, Niderlandiya, BAA, Pokiston, Polsha, Rossiya, Singapur, AQSh, Tailand, Turkmaniston, Ukraina, Finlyandiya, Fransiya, Estoniya, Yaponiyaning 60dan ortiq kompaniyalari o‘z turistik dasturlari bilan ishtirok etadi. Bu haqda "Jahon" AA xabar bermoqda.
Yubiley ko‘rgazmada ilk bor barcha viloyatlar tanishtiriluvchi Milliy pavilon tashkil etiladi: undan O‘zbekistonning eng diqqatga sazovor joylari, sayohat narxlari, yangilik va chegirmalar, fotosurat va bukletlar o‘rin oladi. Ushbu maydondagi sahnada folklor chiqishlar va milliy liboslar namoyishi ham o‘tkaziladi.
14 aprel kuni "Dam olish dunyosi-2017" xalqaro turistik ko‘rgazmasi doirasida Qozog‘iston turizm vazirligi bilan hamkorlik memorandumi, O‘zbekiston va Qozog‘iston hamda Ozarbayjon xususiy turistik kompaniyalar assotsiatsiyalari o‘rtasida ikki tomonlama kelishuvlar imzolanishi rejalashtirilgan.