21:19 24 Aprel 2018
Efir
Glavnыy imam Indonezii Nasariddin Umar i muftiy Uzbekistana Usmonxon Alimov

Indoneziya bosh imomi Oʻzbekistonning turizm boʻyicha vakili boʻlishga tayyorligini bildirdi

© Upravleniye musulman Uzbekistana
Turizm
Havola olish
25310

U Indoneziya davlatidan bir oyda 300 ming ziyoratchi Turkiya orqali umra safariga borishi, agar ular respublikadagi tabarruk joylar toʻgʻrisida xabar topishsa, albatta, hech ikkilanmay Oʻzbekistonni tanlashlarini taʼkidladi

TOSHKENT, 8 dek – Sputnik. 7 dekabr kuni Indoneziyaning Jakarta shahridagi "Istiqlol" jome masjidi imom-xatibi Nasaruddin Umar boshchiligidagi delegatsiya diniy idoraga tashrif buyurdi. Bu haqda Oʻzbekiston musulmonlari idorasi matbuot xizmati xabar bermoqda.

Mehmonlarni Din ishlari boʻyicha qoʻmita raisi Ortiqbek Yusupov, Turizmni rivojlantirish davlat qoʻmitasi raisi Aziz Abduhakimov va Oʻzbekiston musulmonlari idorasi raisi, muftiy Usmonxon Alimov qabul qildi.

O.Yusupov Oʻzbekistonda din sohasida amalga oshirilayotgan ishlar, prezident tashabbusi bilan Oʻzbekistonda Islom tsivilizatsiyasi markazi, Samarqandda Imom Buxoriy xalqaro ilmiy tadqiqot markazi tashkil etilayotgani, ixtisoslashgan ilmiy maktablar oʻz faoliyatini boshlagani haqida soʻzlab berdi. U indoneziyaliklarni ruhiy ozuqa oladigan va inson qalbi orom topib, maʼnaviy yuksalishiga xizmat qiladigan tabarruk qadamjolarni ziyorat qilishga taklif etdi.

Muftiy Usmonxon Alimov Oʻzbekiston va Indoneziya oʻrtasidagi hamkorlik koʻp yillardan buyon davom etib kelayotganini bildirdi. Muftiy Indoneziya davlatining sobiq prezidenti Suxarto 1989-1996 yillar oraligʻida bir necha bor Oʻzbekistonga tashrif buyurgani, xususan, Samarqand viloyatiga safarini Imom Buxoriy hoki qoʻnim topgan maskanga yuksak ehtirom koʻrsatish bilan boshlaganini alohida esga oldi.

Turizmni rivojlantirish davlat qoʻmitasi raisi A.Abduhakimov sayyohlik sohasiga katta eʼtibor qaratilayotgani, Indoneziya bilan turizm yoʻnalishida juda katta ishlar rejalashtirilgani haqida soʻzladi. Bu borada barcha chora-tadbirlarni uyushtirish, charter reyslarni tashkil etish va viza tartiblarini soddalashtirish borasida Oʻzbekiston tomoni tayyor ekanini maʼlum qildi.

Uchrashuvda Nasaruddin Umar oʻz fikr-mulohazalarini quyidagicha bayon qildi:

– Men Jakarta shahridagi "Istiqlol" jome masjidi imom-xatibi hisoblanaman. Ushbu masjid imom-xatibi mamlakat prezidenti tomonidan tayinlanadi va u Indoneziyadagi barcha masjidlar faoliyatini muvofiqlashtiradi. Biz Oʻzbekistondagi ziyoratgohlarni koʻrib hayratlandik va yuqoridagi gaplardan ilhomlanib, albatta, men Indoneziyadagi Oʻzbekistonning turizm sohasi boʻyicha vakili boʻlishga tayyorman.

U Indoneziya davlatidan bir oyda 300 ming ziyoratchi Turkiya orqali umra safariga borishi, agar ular respublikadagi tabarruk joylar toʻgʻrisida xabar topishsa, albatta, hech ikkilanmay Oʻzbekistonni tanlashlarini taʼkidladi.

"Bizda umra safarlari ayni paytda Turkiya orqali amalga oshiriladi. Ziyoratchilar ushbu mamlakatda uch kun boʻlishadi. Agar yurtingizni Turkiya bilan qiyoslash mumkin boʻlsa, mamlakatingizda ziyorat turizmi uchun juda ham katta imkoniyat bor. Ayniqsa, tarixiy obidalar, osori atiqalar va tarixiy voqealarning adogʻi yoʻq", – dedi Nasaruddin Umar.

Muloqot davomida ziyorat turizmini rivojlantirish uchun Jakarta–Toshkent yoʻnalishida toʻgʻridan-toʻgʻri reys ochish, sayyohlik vizasi berishni joriy etish, Oʻzbekistonning turizm salohiyatini bildiradigan ixcham va loʻnda shior tanlash, tajribali mutaxassislar ish uslubidan foydalanish juda katta natija berishi alohida qayd etildi.

Asosiy mavzular