TOShKENT, 4 yanv - Sputnik. Joriy yil 21-23 fevral kunlari Buxoroda ziyorat turizmi bo‘yicha birinchi Xalqaro forum bo‘lib o‘tadi. Bu haqda O‘zbekistonning Qirg‘izistondagi elchixonasiga tayangan holda Kabar agentligi xabar qildi.
Forum ziyorat-turizmi sohasida xalqaro hamkorlikni kengaytirish, O‘zbekistonni dunyodagi eng yirik ziyorat turizmi markazlaridan biri sifatida tan olinishini ta’minlash, shuningdek, mamlakatni chet el ziyoratchi-turistlariga yanada tanitish va jozibador turistik yo‘nalishlaridan biri sifatida ochib berish, to‘g‘ridan-to‘g‘ri investitsiyalarni jalb qilish hamda xalqaro "Halol" standartlarini joriy etish maqsadida o‘tkaziladi.
Forum ishida olimlar, teologlar, ekspertlar va ziyorat-turizmi sohasidagi mutaxassislar ishtiroki kutilmoqda.
Tadbir ishtirokchilari ziyorat joylar va Buxorodagi ziyorat-turizm obyektlari bo‘ylab ekskursiyalar tashkil etiladi.
Bundan tashqari, forumda ziyorat-turizmi, ziyorat turizmi infratuzilmasini rivojlantirish uchun investitsiya va grantlarni jalb qilish masalalari muhokama qilinadi.
Kutilishicha, forum ishtirokchilari tomonidan islom madaniyati va sivilizatsiyasi rivojida O‘zbekiston madaniy-tarixiy markazlari roli to‘g‘risida Deklaratsiya qabul qilinadi va chet ellik sheriklar bilan investitsion shartnomalar tuziladi.
