AQSh prezidenti "Magnitskiy qonuni"ni butun dunyoga joriy qildi

TOShKENT, 24 dek — Sputnik. AQSh prezidenti Barak Obama tomonidan juma kuni imzolangan "2017 yil harbiy sarf-harajatlari to‘g‘risida"gi qonun "Magnitskiy qonuni"ni butun dunyoga joriy etish imkonini beradi, deb xabar qilmoqda RIA Novosti.

Hujjat AQSh prezidenti nazdida suddan tashqari qotillik, qiynoq, korrupsiya, o‘maruvchilik hamda xalqaro miqyosda tan olingan inson huquqlarini poymol etganlikda gumonlagan istalgan davlat fuqarosiga nisbatan sanksiya kiritish imkonini beradi. Sanksiyalar AQSh nazoratida bo‘lishi mumkin bo‘lgan mol-mulk yoxud aktivlarni "muzlatib" qo‘yishni nazarda tutadi.

Yangi qonunda Ukraina masalasi hal etilmagunga qadar Moskva bilan harbiy sohada hamkorlik qilish ta’qiqlanishi alohida qayd etilgan.

Hujjatga ko‘ra, Rossiyani jilovlab turish uchun amerikalik harbiylarga 4 milliarddan ziyod mablag‘ ajratilgan.

Jumladan, 350 million dollar harbiy yordam tariqasida Kiyevga taqdim etilishi aytib o‘tilgan.

Qonunda Qrimni Rossiyaning tarkibiy qismi deb tan oluvchi har qanday harakatlar ta’qiqlanishi aytib o‘tilgan.

Ushbu qonun AQSh tomonidan 2012-yilning 14-dekabrida qabul qilingan "Magnitskiy akti"ning kengaytirilgan shaklidir, deb yozadi nashr.

"Rossiya hukumati, o‘z navbatida "Magnitskiy ishi"ning siyosiy tus olishiga yo‘l qo‘ymaslik kerakligi haqida ko‘p marotaba ta’kidlaganlar", — deyilgan xabarda.

Eslatib o‘tamiz, soliq bilan bog‘liq maxinatsiyalarda ayblangan va Moskva SIZOsida vafot etgan Hermitage Capital fondi auditori Sergey Magnitskiy nomi bilan atalgan "Magnitskiy ro‘yxati" AQSh Moliya vazirligi tomonidan 2013-yilning aprelida e’lon qilingan. Ushbu ro‘yxat qator rossiya fuqarolariga nisbatan vizaga oid hamda iqtisodiy choralar ko‘rilishini nazarda tutadi. AQSh Davlat departamenti, shu ish bilan bog‘liq bo‘lgan 60 nafar rossiyalik amaldorlarning AQSh banklaridagi mablag‘larini muzlatib,  ularning mamlakatga kirishini ta’qiqlovchi qonun qabul qilib, uni "Magnitskiy qonuni" deb atagan edi.