TOShKENT, 10 fev — Sputnik. Tojikiston prezidenti Emomali Rahmon Favqulodda vaziyatlar bo‘yicha davlat komissiyasi majlisida ishtirok etdi, deb xabar qilgan Tojikiston Respublikasi prezidenti matbuot-xizmati.
Rahmon vazirliklar va turli idoralar rahbarlari va mahalliy hokimiyat vakillari zimmasiga Tojikiston yo‘llaridagi muammolarni bartaraf etish va yo‘l-transport obyektlarini qor va ko‘chkilardan tozalash vazifasini yuklagan.
Tojikiston rahbari tog‘li hududlardan o‘tuvchi avtomagistrallarda yangi himoya qurilmalarini barpo etishni buyurgan va barcha xavfli hududlar mudofaasini kuchaytirish bo‘yicha yangi rejalarni ishlab chiqish topshirig‘ini bergan.
Mamlakat rahbari olimlarga mamlakat hududidagi muzliklar va ko‘llar holatini o‘rganish topshirig‘ini bergan.
Eslatib o‘tamiz, ilgariroq qor ko‘chkisi yuz berishi oqibatida Tojikistonda 7 kishi halok bo‘lgandi. Ammo norasmiy xabarlarga qaraganda, tabiiy ofat natijasida 80dan ortiq inson halok bo‘lgan.
Joriy yilning 1-fevralida Tojikiston hukumati tabiiy ofatlar sababli xorij mamlakatlaridan ko‘mak so‘radi.
Sababi tog‘li tumanlardagi aksariyat aholi maskanlari va yo‘llar qor ko‘chkilari, suv toshqinlari, tog‘ ko‘chkilari xavfi ostida qolgan. Tojikiston gidrometeorologiya markazining ma’lum qilishicha, fevralda ham yog‘ingarchilik meyoridan ko‘p bo‘lishi kutilmoqda.
