TOShKENT, 11 noya – Sputnik. Kecha, 11-noyabr kuni Turkiya prezidenti Toyyib Erdo‘g‘on bir necha musulmon davlatlari uchun Turkiyada vizasiz qolish muddatini uzaytiruvchi qarorga imzo chekdi.
Yangi tartibga ko‘ra O‘zbekiston fuqarolari Turkiyada 6 oy ichida 90 kun vizasiz qolishlari mumkin. Avvalgi tartibga ko‘ra ushbu muddat 6 oy ichida 30 kunni tashkil etardi.
Yangi viza tartibi Qozog‘iston va Tojikiston fuqarolari uchun hamda Liviyaning 12 yoshdan kichik va 65 yoshdan katta fuqarolari uchun ham amal qiladi.
Eslatib o‘tamiz, 2017-yilda O‘zbekistonda ham Turkiya fuqarolari uchun kirish vizasi bekor qilingan edi. Bugungi kunda turkiyaliklar O‘zbekistonda bir oygacha vizasiz bo‘lishlari mumkin.
