TOShKENT, 28 okt - Sputnik. Rossiya Afg‘oniston chegarasida joylashgan harbiy bazasiga ilk bor S-300 zenit-raketa majmualarini joylashtirdi, deb xabar qilmoqda Rossiya OAVlari Markaziy Harbiy qo‘mondonlik xabariga asosan.
Rasmiy xabarda aytilishiga ko‘ra, Tojikistonda joylashgan 201 - Rossiya harbiy bazasi ixtiyoriga ilk bor "S-300PS" tizimi yetkazib berildi. 30 ta texnik birlikdan iborat divizion Volgabo‘yi hududidagi Markaziy harbiy arsenaldan temir yo‘l transporti yordamida yetkazib beriladi.
"Ayni damda Rossiya harbiy injenerlari texnikani joylashtirish uchun mos hududlarni tayyorlamoqda. Hududlar tayyor bo‘lganidan so‘ng zenit-raketa majmualari harbiy-tajribaviy navbatchilikka kirishadi. Divizionning asosiy vazifasi etib 201-harbiy bazani havo-kosmik hujumi vositalaridan hamda Markaziy Osiyo kollektiv xavfsizlik hududini Tojikiston qo‘shinlari bilan birga havo hujumidan himoya qilish belgilanadi", - deyilgan xabarda.
Eslatib o‘tamiz, S-300 Rossiyaning 75-200 km masofalarda turli havo hujumi vositalaridan himoya qiluvchi zenit-raketa tizimidir. PS ushbu tizimning past uchuvchi jismlarni aniqlovchi mobil radarlar bilan jihozlangan modifikatsiyasidir.