TOShKENT, 13 fev – Sputnik. Airbus konserni mutlaq yangi turdagi yo‘lovchi samolyot modelini namoyish qildi.
Yangi samolyot “aralash qanot” uslubida qurilgan bo‘lib, uning fuzelyaji va qanoti yagona element sifatida yasalgan. Mutaxassislar fikriga ko‘ra, bunday konstruksiya oddiy “tor fuzelyajli” samolyotlarga qaraganda 20 %ga tejamkor bo‘ladi.
Yangi samolyot prototipi nomi MAVERIC (Model Aircraft for Validation and Experimentation of Robust Innovative Controls) bo‘lib, model uzunligi 2 metr, qanotlar kengligi 3,2 metrni tashkil qiladi. Model qanot oldi va qanot orti “qanotchalari” va vingletlar bilan jihozlangan. Uning dvigatellari fuzelyaj ustida joylashgan. Dvigatel ustida esa yo‘nalil rullari joylashgan.
Yangi samolyot fuzelyaji qanoti bilan birlashgani tufayli, uning yo‘lovchilar kabinasi ichi ham butunlay boshqacha ko‘rinishga ega bo‘ladi. Kabina juda keng bo‘lib, kreslolarni turli xil uslubda joylashtirish mumkin.
MAVERIC uchish sinovlari 2019-yilning iyun oyidan buyon o‘tkazib kelinmoqda va uni yakunlash 2020-yilning iyun oyiga belgilangan.
