TOShKENT, 13 fev — Sputnik. Moskva shahar sudi Twitter kompaniyasini o‘z serverlarini Rossiya hududiga ko‘chirishdan bosh tortgani uchun jarimaga tortdi, deb xabar qilmoqda RIA Novosti.
Ma’muriy javobgarlik jarimasi miqdori 4 million rublni tashkil qildi. Sud majlisiga sudlanuvchi (Twitter) va da’vogar (Roskomnadzor) tomonlar vakillari kelishmadi. Sudya yozma materiallar asosida qaror chiqardi, - deyilgan xabarda.
Xuddi shunday jarima Facebook kompaniyasini ham kutmoqda. Xorijiy kompaniyalar ushbu jarimani 60 kun ichida to‘lashi kerak.
Eslatib o‘tamiz, 2015-yilning 1-sentabrida qabul qilingan qonunga asosan Rossiya fuqarolariga tegishli bo‘lgan ma’lumotlar Rossiya hududida saqlanishi kerak. Ushbu qonunni buzgan shaxslar jarima solish bilan jazolanadi. Qoidabuzarlikni ilk bor sodir etgan korxonalar 1-6 million rubl miqdorida, qayta sodir etganda esa 6-18 million rubl miqdorida jarimaga tortiladi. Kompaniya sahifalari blokirovka qilinishi ham mumkin.
