02:33 29 Sentyabr 2020
Efir
  • RUB132.07
  • EUR12003.57
  • USD10321.21
Dunyoda
Havola olish
699 0 0

Qozogʻistonda vaziyat ogʻirlashmoqda: bir hafta ichida 45 kishi qurbon boʻldi, Oʻzbekistonda toʻyda kelin va bir necha kishi koronavirus yuqtirib oldi, Tojikistonda mintaqada kunlik eng kam holat aniqlanmoqda, Qirgʻizistonda kasallanganlar soni 3100 nafardan oshdi.

TOSHKENT, 21 iyun — Sputnik. Soʻnggi taqdim etilgan maʼlumotlarga koʻra, Markaziy Osiyo davlatlarida jami 31 991 ta koronavirus bilan bogʻliq holat qayd etilgan.

Qozogʻistonda vaziyat ogʻirlashmoqda. Epidemiologik vaziyat va koronavirus bilan kasallanish soni koʻpayishi sabab Nur-Sulton, Olmaota va Qozogʻistonning bir nechta mintaqalarida 20-21 iyun kunlari yangi cheklovlar joriy etildi. Yirik shaharlarda savdo-koʻngilochar markazlar, jamoat transporti va odamlar guvjum boʻladigan boshqa joylar yopildi.

Mamlakat mintaqada holat va oʻlim boʻyicha yetakchilik qilmoqda. Qozogʻistonda oʻtgan kun davomida 446 ta yangi holat tasdiqlangan. Kasallanganlarning umumiy soni 17 225 nafarga yetgan. Shulardan 10 671 nafari tuzalib ketgan. Jami 118 ta oʻlim holati kuzatilgan. Hafta davomida esa 45 kishi virus qurboni boʻlgan. Bundan tashqari, Qozogʻistonda kasallik alomatlarisiz oʻtayotgan bemorlar soni 8845 nafarga yetgan. Ular alohida qayd etiladi va asosiy statistikaga kiritilmaydi.

© Sputnik / Aleksey Nikolskiy

Oʻzbekistonda oʻtgan kun davomida 207 ta yangi holat aniqlandi. Yangi kasallanganlarning 179 nafari karantin muassasalarida, 19 nafari aholi orasida (shundan 13 nafari Toshkent shahrida, 4 nafari Toshkent viloyatida, 1 nafari Surxondaryo hamda yana 1 nafari Xorazm viloyatida), qolgan 9 nafari esa xalqaro yuk tashuvchi avtomashina haydovchilari orasida aniqlangan.

Kuni kecha Toshkent shahri Yunusobod tumanida yashovchi fuqaro toʻrt kun ichida ketma-ket ikkita nikoh toʻyi oʻtkazgan. Toʻyda kelin va 12 nafar marosim ishtirokchisi koronavirus yuqtirib olgan. Yuzlab odamlar virus yuqtirib olganlikda gumon qilinib, tahlil natijalarini kutmoqda.

2020 yil 21 iyun soat 10:00 holatiga koʻra, Oʻzbekistonda koronavirus infektsiyasi qayd etilganlar soni 6216 (+63) nafarni tashkil etmoqda.

Respublika boʻylab 4290 nafar (69 foiz) bemor butunlay davolanib chiqqan. Mamlakatda 19 ta oʻlim holati kuzatilgan. Qayd etish joizki, hafta davomida oʻlim holati kuzatilmadi.

Tojikistonda mintaqada eng oxirida (30 aprel kuni) koronavirus aniqlangan edi. Soʻnggi maʼlumotlarga koʻra, aniqlanayotgan kunlik holatlar 60-70 tani tashkil edi. Oʻtgan kun davomida 61 kishida koronavirus aniqlangan boʻlsa, 64 kishi darddan forigʻ boʻlgan. Koronavirus bilan kasallanganlarning umumiy soni 5399 nafarga yetgan. Shulardan 3894 nafari (72,1 foizi )tuzalib ketishga muvaffaq boʻlgan. Qurbonlar soni esa 51 nafarga yetgan.

Qirgʻistonda oʻtgan sutka davomida 170 ta yangi holat aniqlangan.  Kasallanganlarning umumiy soni 3151 nafarni tashkil etmoqda. Shulardan 2011 nafari COVID-19ni yenggan. 37 ta oʻlim holati kuzatilgan. Bu oʻtgan haftaga qaraganda 10 taga koʻproq.

Turkmanistonda esa hozirga qadar koronavirus rasman qayd etilmagan va u mintaqadagi infektsiyadan xoli mamlakat boʻlib turibdi.

Butun dunyo boʻylab 8,3 milliondan ziyod kishi koronavirus yuqtirib olgan. 4,7 milliondan ortiq kishi shifo topgan. Qurbonlar soni 467 mingdan oshgan.

Asosiy mavzular