"O‘zbeknavo" bayonoti: estrada yulduzlarining "Ahmadboy"ga aloqasi yo‘q

TOShKENT, 8-iyul — Sputnik. "O‘zbeknavo" estrada birlashmasi o‘zbek shou-biznesi yulduzlarining Ahmadboy Tursunboyev moliyaviy piramidasiga aloqadorligiga ishonishmaydi, deb xabar qildi Sputnik O‘zbekiston muxbiriga tashkilot rahbariyati.

Birlashma rahbariyatining fikricha, o‘zbek estradasi yulduzlari va firibgar Ahmadboy o‘rtasidagi bog‘liqlik bo‘lmagan gap. Ammo birlashma vakilining aytishicha, bu masala yuzasidan "O‘zbeknavo" hech qanday surishtiruv o‘tkazmagan. "Chunki bu tashkilot vakolatiga kirmaydi", deb ta’kidlagan suhbatdosh.

"U (ya’ni Ahmadboy demoqchi, tahr.) haqda ko‘p eshitdim, matbuotlarda o‘qidim. Sizga to‘g‘risini aytaymi, misol uchun, men amaldor sifatida, bu singari ertaklarga ishonmayman. O‘zbek estradasi yulduzlari Ahmadboyga pul berishlari mumkin emas? Nega? Kechirasiz-u, ular moliyaviy piramida singari shubhali tashkilotlarga pul tikadigan darajada ahmoq bo‘lmasa kerak? Tushunyapsizmi!?… Ahmadboyga pul bergan estrada yulduzlari ro‘yxatigacha e’lon qilindi, unda san’atkorlar nomlari birma-bir sanab o‘tilgan. Nima uchun san’atkorlarimiz bu ishga aralashishlari mumkinmasligini aytaman. Gap shundaki, ular mashhur san’atkor ekanliklaridan tashqari, har biri o‘z biznesiga ega. San’atkorlarimiz o‘z kompaniya va firmalarini yuritadilar. Ahmadboyning o‘zi ularga xavas qilgulik darajada bu ishda muvaffaqiyat qozongan ba’zilari. Shu bois, ular orasida bu qadar ahmoqlari borligiga ishonmayman. Bu bir bekorchi tomonidan o‘ylab topilgan uydirmadan boshqasi emas", — deya o‘z fikrini bayon qildi suhbatdosh.

E’lon qilingan ro‘yxatga muvofiq, Ahmadboy tomonidan tashlangan "to‘r"ga ilinganlar qatorida: birinchi raqamli o‘zbek estradasi yulduzi Ozodbek Nazarbekov(400 ming $), hofiz Sherali Jo‘rayev(300 ming $), Rashid Holiqov(250 ming $), Murod Rajabov(100 ming $), Jahongir Poziljonov(50 ming $), Munisa Rizayeva(35 ming $), Sardor Rahimxon(15 ming $)lar sanab o‘tilgan edi. Ro‘yhatda jami 18 nafar mashhurlar qayd etilgan.

Shuni e’tirof etish joizki, o‘zbek estradasi yulduzlari hozircha Ahmadboy bilan bog‘liq mojaro yuzasidan izoh berishga shoshilmayaptilar. Ular bu borada sukut saqlashni ma’qul ko‘rishmoqda. Manbalarning so‘zlariga qaraganda, san’atkorlarning aksariyati huquqni muhofaza qilish organi xodimlari va muxlislar e’tiborini jalb qilmaslik maqsadida shunday yo‘l tutmoqda.

San’atkorlar orasida faqatgina Obid Asomov hamda Munisa Rizayevalar Instagram sahifasida "Ahmadboy mashmashasi" haqida o‘z izohlarini yozib qoldirganlar.