O‘zbek dehqonlari 29 mln $ lik shartnoma imzoladilar

TOShKENT, 13 avg — Sputnik. O‘zbekistonda agrar sohada amalga oshirilayotgan izchil islohotlar samarasida fermerlar paxta va g‘alla yetishtirish bilan cheklanib qolmasdan, intensiv bog‘lar barpo etish, meva-sabzavot yetishtirish hamda uni eksport qilish bilan shug‘ullanmoqda, deb yozadi "Jahon" AA.

Xabarda ta’kidlanishicha, O‘zbekiston Prezidenti Islom Karimovning joriy yil 12-apreldagi “Meva-sabzavot, kartoshka va poliz mahsulotlarini xarid qilish va ulardan foydalanish tizimini takomillashtirish chora-tadbirlari to‘g‘risida”gi qarori bu boradagi ishlarni yangi bosqichga ko‘tarishda muhim dasturilamal bo‘lmoqda.

"Navoiy viloyati dehqon va fermerlari ham yerdan unumli foydalanish, aholi dasturxoni va bozorlar to‘kinligini ta’minlash maqsadida meva-sabzavot yetishtirishning o‘ziga xos usullaridan keng foydalanmoqda. Natijada mahsulotlar xorijga ham eksport qilinmoqda. Yarmarkada viloyatdagi 20 dan ortiq eksportchi korxona va fermer xo‘jaliklari 35 ming tonna meva-sabzavot sotish bo‘yicha shartnomalar imzoladi", — deyiladi xabarda.

Joriy yilda viloyatda 122,5 ming tonna meva-sabzavot yetishtirish mo‘ljallangan.