TOShKENT, 5 sen — Sputnik. O‘zbekiston va Kuba o‘rtasida allaqachonlar mustahkam aloqalar o‘rnatilgan, Prezident Islom Karimovni esa Kubaning oliy hukumati hurmat qilardi, deydi Rossiya federatsiya kengashi raisining xalqaro ishlar bo‘yicha birinchi o‘rinbosari Vladimir Djabarov.
Ekspertning fikricha, Kuba hukumati O‘zbekiston Prezidentini 1990-yillarda, uning Rossiyaning birinchi prezidenti Boris Yelsinning ayrim qarashlariga keskin qarshi chiqqan davridan hurmat qila boshlagan.
"Islom Karimov Boris Yelsinning qarashlariga o‘ta keskin ravishda qarshi chiqqan va e’tirozini ochiqchasiga bildirgan, – deydi Vladimir Djabarov. – Bu esa Yelsin siyosati bilan aksariyat masalalarda kelisha olmagan Kuba hukumatining e’tiboriga tushgan. Rossiyaning birinchi prezidenti parishonxotirligi bilan ajralib turardi. Yarimorol unutilgan, taqdir hukmiga tashlab qo‘yilgandi. Rossiyaning Kuba bilan do‘stligi 2000-yillarga kelibgina qayta tiklana boshladi".
O‘zbekiston Prezidenti esa Kubaga doim iliq munosabatda bo‘lgan, ta’kidladi ekspert va respublikaga muntazam ravishda kubalik mehmonlar tashrif buyurishganini qo‘shib qo‘ydi. Bundan tashqari, kubalik yetakchilarga Islom Karimovning davlat boshqaruv uslubi judayam yoqardi.
"Kuba O‘zbekistonning Ozodlik oroli bilan SSSR davrida o‘rnatilgan mustahkam aloqalarini yodda tutgan holda o‘z birdamligini namoyish etdi, – davom etadi Djabarov. – Biroq Rossiyada motam e’lon qilinmagani Rossiya hukumati Islom Karimovni yetarlicha hurmat qilmaydi degani emas. Har kim o‘z qayg‘usini o‘zicha bildiradi va men bu holatga e’tibor qaratmaslikni so‘rardim. O‘zbekiston Prezidenti Rossiyaning eng ulkan do‘sti edi. U Rossiya prezidenti bilan ajoyib, judayam samimiy munosabatda edi".
Prezident Islom Karimov 2-sentabr kuni vafot etdi va ertasi kuni o‘zi tug‘ilib-o‘sgan Samarqand shahrida dafn etildi. 3-sentabrdan 5-sentabrga qadar butun O‘zbekistonda motam e’lon qilingan.
