TOShKENT, 12 sen — Sputnik. O‘zbekiston chegara qo‘shinlari iyul oyi davomida 129 nafar chegara buzuvchini qo‘lga oldilar, deb xabar berdi milliy xavfsizlik xizmati davlat chegarasini qo‘riqlash bo‘yicha qo‘mita vakili Sputnik muxbiriga.
Chegarachilar shuningdek umumiy qiymati 489,5 million so‘mlik turli tovar-moddiy boyliklarning kontrabandasiga chek qo‘ydilar.
"Chegara buzish holatlarining aksariyat qismi o‘zbek-qirg‘iz chegarasiga to‘g‘ri keladi – barcha qonunbuzarliklarning 98 foizga yaqini. Xususan ushbu yo‘nalishda qo‘lga olingan qoidabuzarlar soni 122 kishini tashkil etadi. 75ta holatda 488 million so‘mlikdan ortiq tovar-moddiy boyliklar qo‘lga olingan", — dedi manba.
Bundan tashqari O‘zbekiston MXX chegara qo‘shinlari tomonidan chegarabuzarlarning qonuniy talablarga bo‘ysunmaganligi sababli qurol ishlatilishi yuz bergan 12 ta holat ham aynan Qirg‘iziston bilan chegarada sodir bo‘lgan.
Suhbatdoshning aytishicha, o‘zbek-qirg‘iz chegarasida qonun buzilish holatlarining ko‘payishiga qirg‘iz kontrabandachilarining turli xalq iste’moli mollarini O‘zbekistonga noqonuniy olib kirishga urinishlari va qo‘shni tomondan chegaralarni qo‘riqlash tizimi samarasizligi sabab bo‘lmoqda.
