TOShKENT, 26 yanv — Sputnik. Tadbirkorlik hamjamiyati istaklaridan kelib chiqib, O‘zbekiston Markaziy banki Korporativ kartalar to‘g‘risidagi yangi Nizomni qabul qildi va uni Adliya vazirligiga ro‘yxatdan o‘tkazish uchun yubordi. Bu haqda Markaziy bank pul muomalasi departamenti xodimi Faxriddin Boboyevga tayanib nuz.uz xabar bermoqda.
Uning aytishicha, korporativ plastik kartalar barcha tashkilot va muassasalar tomonidan hech qanday cheklovlarsiz qabul qilinadi. Boboyevning qayd etishicha, bunda faqat bitta cheklov kuchda qoladi — korporativ kartadan bankomatlar orqali naqd pul olib bo‘lmaydi.
Hozirda amaldagi Nizomda ba’zi cheklovlar mavjud, ya’ni yakka tadbirkorlar uy-joy kommunal sohasidagi tashkilotlar va ayrim davlat muassasalariga korporativ karta orqali to‘lovlarni amalga oshira olmaydilar.
Yangi Nizom Adliya vazirligida rasman ro‘yxatdan o‘tkazilgach, qonuniy kuchga kiradi.
