TOShKENT, 26 fev — Sputnik. Toshkent viloyati, Qibray tumani "Yoshlik" MFYda yashovchi, ishlamaydigan, 1981-yilda tug‘ilgan fuqaroning uyida yollanib ishlab yurgan, Chirchiq shahrida yashovchi shaxs uy bekasi uxlab qolganidan foydalanib, o‘g‘rilikka qo‘l urdi, deb xabar bergan O‘zbekiston Respublikasi IIV matbuot-xizmati.
Ichki ishlar xodimlari tomonidan olib borilgan tezkor tadbirlar natijasida mazkur jinoyatni sodir etgan, 1971-yilda tug‘ilgan shaxs aniqlanib, ushlangan.
Ichki ishlar vazirligi, shuningdek, qulfbuzar avtomashina o‘g‘rilari qo‘lga olingani haqida axborot bergan.
Ma’lumotlarga ko‘ra, Samarqand viloyati, Urgut tumanida yashovchi 1961-yilda tug‘ilgan fuqaro ichki ishlar bo‘limiga ariza bilan murojaat qilib, kechasi uning uyi oldidagi garajiga qulfini buzib, "VAZ — 2106" avtomashinasini o‘g‘irlab ketganligini aytgan.
Ichki ishlar xodimlari tomonidan olib borilgan tezkor surishtiruv ishlari natijasida mazkur jinoyatni shu tumanda yashovchi, ishlamaydigan, 1996-yilda hamda 1998-yilda tug‘ilgan shaxslar sodir etganliklari aniqlangan.
