Mirziyoyevning Afg‘oniston bo‘yicha maxsus vakili lavozimi joriy etildi

TOShKENT, 8-iyun — Sputnik. O‘zbekiston Respublikasi Tashqi ishlar vazirligi markaziy apparatida O‘zbekiston Respublikasi prezidentining Afg‘oniston bo‘yicha Maxsus vakili lavozimi va uning 3 xodimdan iborat apparati joriy etildi.

Bu ish O‘zbekiston prezidenti yuritayotgan tashqi siyosat, Hukumat qarorlari va Vazirlik rahbariyatining Afg‘oniston Islom Respublikasi bilan hamkorlik masalalari bo‘yicha ayni vaqtda berayotgan ko‘rsatmalarini o‘z vaqtida va to‘liq amalga oshirish, shuningdek, O‘zbekiston Respublikasining xalqaro siyosiy, iqtisodiy va insonparvarlik tashabbuslarini amalga oshirishda ishtirok etayotgan vazirlik va muassasalar faoliyatini muvofiqlashtirish  maqsadida amalga oshirilganligi ta’kidlangan.

O‘zbekiston Respublikasi Tashqi ishlar vazirligi Prezidentning Afg‘oniston bo‘yicha maxsus vakili apparati to‘g‘ri ishlashini ta’minlash uchun 1 ta avtomobil, ofis mebeli, kompyuterlar va boshqa uskunalar xarid qilinishi uchun zarur mablag‘lar ajratilishi belgilangan.

Eslatib o‘tamiz, ilgariroq, O‘zbekiston Respublikasi Farmoni bilan Ismatulla Ergashev Mirziyoyevning Afg‘oniston bo‘yicha maxsus vakili etib tayinlangan edi.

Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.