TOShKENT, 22 noya — Sputnik. Joriy yilning 2-oktabrida O‘zbekiston Respublikasi prezidenti rahbarligida o‘tkazilgan yig‘ilishdagi topshiriqqa binoan, 70 kunlik favqulodda holat e’lon qilindi, dedi chorshanba kuni o‘tkazilgan matbuot-anjumanida jurnalistlarga "O‘zbekenergo" AJning elektr tarmoqlaridan foydalanish boshqarmasi boshlig‘i Sunatilla Yusupov.
Yusupovning so‘zlariga ko‘ra, 11-noyabr kuni ishchi guruhlar tomonidan 2017-2018 yy qish mavsumiga tayyorgarlik holati bo‘yicha shartli ravishda "yaxshi", "o‘rta", "og‘ir" va "o‘ta og‘ir" deb toifalangan mahallalar o‘rganib chiqilgan.
"Jami 9095ta mahallalardan 8518tasi "yaxshi", 548tasi "o‘rta", 41tasi "og‘ir" mahallalar deb, shartli ravishda toifalandi. Ushbu shartli ravishda toifalangan "og‘ir" mahallalarda amalga oshiriladigan chora-tadbirlar ishlab chiqilib, tasdiqlandi", — deb aniqlik kiritdi Yusupov.
Chora-tadbirlarga asosan, 41ta belgilab olingan mahallalarda jami transformator punktlarini almashtirish hamda elektr tarmoqlari punktlarida mukammal ta’mirlash ishlari bajarilgan.
Yusupov ushbu ishlarga 1,3 mlrd so‘m mablag‘lar yo‘naltirilganligini hamda rejalashtirilgan barcha ishlar 10-dekabrga qadar to‘liq yakunlanishi ta’minlanishini ma’lum qildi.
"O‘zbekenergo" vakilining so‘zlariga ko‘ra, bugungi kunda ushbu ishlarning 70% bajarilgan.
