TOShKENT, 26 noya — Sputnik. Siyosiy arbob Feliks Kulov Facebook ijtimoiy tarmog‘ida Rossiyaning birinchi prezidenti Boris Yelsin qirg‘izistonlik hamkasbi Askar Akayevning boshini qoshiqlar yordamida "baraban" qilgani haqidagi mish-mishlarni inkor etdi.
Yelsin Akayevning boshiga qoshiqlar bilan tushirgani haqidagi mish-mishlar 20-yildan buyon tilga olinib keladi. Yaqinda bu haqda Qirg‘izistonning sobiq prezidenti Almazbek Atambayev ham esga oldi, deb yozadi Sputnik Qirg‘iziston nashri.
Uning so‘zlariga ko‘ra, Yelsinning chap tomonidan o‘tirgan Akayev va o‘ng tomonidan joy olgan yana bir boshqa kishi, sezgirlik qilib, o‘zlarini yonga olishgan, shu bois, garchi qoshiqlar "xavfli darajada yaqin masofadan o‘tib ketgan" bo‘lsada, Rossiya prezidentining qo‘li hech kimga tegmagan.
"Shuni ta’kidlash lozimki, Yelsin o‘zi yo‘l qo‘ygan xatolikni darhol ilg‘adi va boshqa odamni qo‘rqitadigan harakatlarga yo‘l qo‘ygani yo‘q. Men diagonal bo‘ylab o‘tirganim uchun, Yelsin qoshiqlar bilan Akayevning boshiga urmaganini aniq ko‘rganman", — deb yozadi Kulov.
"Yelsinning qoshiqlar yordamida "dirijerlik" qilish odati haqida butun dunyo bilar edi, ammo u hech qachon tasodifan kimgadir tegib ketmagan yoki kimnidir kulgiga qo‘ymagan. Biz endi shu darajada mustaqilmizki, boshimizga qoshiq bilan urdirib qo‘ymaymiz, degan ma’noni ko‘rsatib berish uchun bu misolni keltirishni o‘zimga ep ko‘rmayman, ammo buni aytishim lozim", — deya xotima qilgan siyosatchi.
Feliks Kulov Sputnik Qirg‘iziston muxbiriga juda ko‘pchilik bu haqda xotiralarni chop etishni iltimos qilib kelishganini aytib o‘tgan.
