TOShKENT, 14 dek — Sputnik. Qirg‘iziston Toshkent-O‘sh shaharlari orasida yangi aviaqatnovni ochishni taklif qildi, deb xabar qildi Sputnik muxbiri.
"Ikki davlat viloyatlari o‘rtasida aviaqatnovlarni kengaytirishimiz zarur. Ayniqsa, Toshkent va O‘sh o‘rtasida to‘g‘ridan-to‘g‘ri yangi qatnovni yo‘lga qo‘yish dolzarb masala bo‘lib qoldi. Yangi transport qatnovlari ikki davlat sayyohlik salohiyatini yanada rivojlantiradi", — deb ta’kidladi Qirg‘iziston iqtisodiyot vaziri Artem Novikov.
Mutaxassislar ta’kidlashicha, bu ikki shahar o‘rtasidagi to‘g‘ridan-to‘g‘ri parvozlar aholi orasida katta talabga ega bo‘ladi. Bu O‘sh shahrida nafaqat aholi ko‘pligi jihatidan Qirg‘izistonda ikkinchi o‘rinda bo‘lganligi uchun, balki bu shaharda ko‘plab etnik o‘zbeklar istiqomat qilganligi sababli parvozlarga talab ko‘p bo‘ladi. Bugungi kunda ko‘plab yo‘lovchilar boshqa parvozlar orasida o‘tishlarga 20 soatgacha vaqt sarflashmoqda, to‘g‘ridan-to‘g‘ri parvozga esa bir soatdan ortiq vaqt ketmaydi.
Shu yil iyul oyida O‘zbekiston va Qirg‘iziston aviatsiyasi ma’muriyatlari so‘nggi 9-yil ichida ilk bor to‘g‘ridan-to‘g‘ri muzokaralar o‘tkazishdi. Bundan tashqari, Toshkent-Issiqko‘l yo‘nalishida aviaqatnov yo‘lga qo‘yilgandi.
Bugungi kunga kelib, Toshkent va Bishkek o‘rtasida haftada ikki marotaba parvoz amalga oshiriladi. Bundan avval Qirg‘iziston tomoni ushbu qatnovlarni yana ikki martaga ko‘paytirishga tayyorligini ma’lum qilgandi.
