Sog‘liqni saqlash vazirligi: tezkor tibbiy guruh Qozog‘istonga uchib ketdi

TOShKENT, 19 yanv — Sputnik. O‘zbekiston Sog‘liqni saqlash vazirligida halokat oqibatida jabrlangan fuqarolarga tibbiy yordam ko‘rsatish bo‘yicha tezkor tibbiy guruh tashkil etildi va guruh Qozog‘iston Respublikasiga uchib ketdi, deb xabar qildi vazirlik matbuot xizmati.

Ta’kidlanishicha, Kambustiolog, anesteziolog-reanimatolog, sud-med ekspert va psixolog kabi malakali shifokorlardan tarkib topgan ushbu guruhga Respublika shoshilinch tibbiy yordam ilmiy markazi direktori Asilbek Xudayarov boshchilik qilmoqda. Tezkor tibbiy guruh zarur vositalar, dori-darmon zaxiralari bilan yetarli darajada ta’minlangan.

Respublika shoshilinch tibbiy yordam ilmiy markazida halokat oqibatida jabrlanganlarga yuqori malakali tibbiy yordam ko‘rsatish uchun zaxira o‘rinlari tayyorlandi.

Eslatib o‘tamiz, 18-yanvar kuni Qozog‘istonning Aqto‘be viloyatida, Toshkent vaqti bilan 09:30 atrofida, "Samara-Chimkent" yo‘nalishida harakatlanayotgan avtobus halokatga uchradi. Avtobusda 57 nafar yo‘lovchi bo‘lgan. Yo‘lovchilarning 52 nafari voqea joyida vafot etgan, 5 nafar kishi jarohatlangan. Dastlabki ma’lumotlarga ko‘ra, ular orasida O‘zbekiston fuqarolari ham bor.