TOShKENT, 19 apr — Sputnik. O‘zbekistonda imomlar bepul uy-joylar bilan ta’minlanadigan bo‘ldi.
Bu haqda O‘zbekiston prezidentining 16-aprel kuni imzolangan "Diniy-ma’rifiy soha faoliyatini tubdan takomillashtirish chora-tadbirlari to‘g‘risida"gi Farmonida aytib o‘tilgan.
Fond mablag‘lari hisobidan ushbu idora tizimidagi diniy-ma’rifiy tashkilotlarda faoliyat yuritayotgan xodimlarga, shu jumladan imom-xatiblarga oylik ish haqi to‘lanadi, faoliyat yuritayotgan uy-joyga muhtoj xodimlar xizmat uy-joylari bilan ta’minlanadi.
Bundan tashqari, fond mablag‘lariga yangilangan namunaviy loyihalar bo‘yicha qurilayotgan uy-joylar sotib olinib, ko‘p yillar davomida namunali faoliyat yuritayotgan, uy-joyga muhtoj imom-xatiblarga tekinga beriladi.
O‘zbekiston Vazirlar Mahkamasi, Qoraqalpog‘iston Vazirlar Kengashi, viloyatlar va Toshkent shahar hokimliklari O‘zbekiston musulmonlari idorasining buyurtmasiga asosan idora tizimidagi diniy-ma’rifiy tashkilotlar xodimlariga xizmat uy-joylari va ularga sotib olib berish uchun yangilangan namunaviy loyihalar bo‘yicha qurilayotgan uy-joylarning ajratilishini ta’minlaydi.
