Sport

Sportchilarni tayyorlash boʻyicha mutlaqo yangi tizim joriy qilinadi – prezident

© Press-slujba prezidenta UzbekistanaPrezident Shavkat Mirziyoyev
Prezident Shavkat Mirziyoyev - Sputnik Oʻzbekiston, 1920, 23.05.2022
Obuna boʻlish
Yandex newsTelegram
Har bir mahallada ikkita mavsumda musobaqalar tashkil etilib, yaxshi natija koʻrsatgan yoshlar elektron roʻyxatga kiritiladi.
TOSHKENT, 23 may — Sputnik. Oʻzbekistonda endi sportchilarni tayyorlash va selektsiya qilish boʻyicha mutlaqo yangi tizim joriy qilinadi. Bu haqda prezident Shavkat Mirziyoyev sportni ommalashtirish, sport taʼlimini yaxshilash va iqtidorli sportchilarni tayyorlashga bagʻishlangan yigʻilishda maʼlum qildi.
Taʼkidlanishicha, yoshlarni bolalikdanoq sportga jalb qilish va iqtidorli sportchilarni tayyorlash borasidagi yondashuvlar oʻzgartiriladi.
Yangi tizim Buxoro viloyati misolida tushuntirildi. Jumladan:
har bir mahallada ikkita mavsumda (aprel-iyun, sentyabr-dekabr) musobaqalar tashkil etilib, yaxshi natija koʻrsatgan yoshlar sport boʻlimi va yoshlar yetakchisi tomonidan elektron roʻyxatga kiritiladi;
bu yoshlar viloyatdagi 19 ta sport maktabining maxsus guruhlarida (8 oygacha) murabbiylar bilan bepul shugʻullanadi;
maxsus guruhlardagi professional sportga salohiyati bor yoshlar yoʻnalishiga koʻra viloyatdagi 4 ta ixtisoslashgan maktabga qabul qilinadi (suzish, yakkakurash, oʻyin turlari va yengil atletika, badiiy gimnastika);
sport maktabi trenerlarining ish haqi 35 foizga oshiriladi. Bundan tashqari, yaxshi natija koʻrsatgan maktab direktorlari, trenerlar va boshqa mutaxassislarga qoʻshimcha 50 foizgacha ustama toʻlanadi;
jamoaviy sport turlari boʻyicha hududiy chempionatlarda sportchilari gʻolib boʻlgan trenerlarga 5 foiz, respublika chempionatida – 20 foiz ustama beriladi;
viloyatdagi sport maktablari ixtisosligiga qarab olimpiya sport turlari boʻyicha bazaga aylantiriladi.
Sportni rivojlantirish vazirligiga quyidagi topshiriqlar berildi:
- 279 ta bolalar va oʻsmirlar sport maktablaridagi shart-sharoitlar va trenerlarning malakasini joyiga borib oʻrganish hamda ularni olimpiya sport turlariga ixtisoslashtirish;
- har bir sport maktabini oʻz hududidagi mahalla, maktab va texnikumlar bilan bogʻlab, ularda kamida 1 tadan olimpiya sporti toʻgaraklarini tashkil etish;
- yil yakunigacha sportchilarni mahalladan boshlab tanlab olish boʻyicha elektron platformani ishga tushirish;
- natija koʻrsatgan mahallalarni ragʻbatlantirish tizimini joriy etish;
- sport maktablarini tibbiy asbob-uskunalar, dori darmon va sport kiyimlari bilan taʼminlash uchun joriy yilda 35 milliard soʻm ajratish;
- 1 sentyabrgacha maktab, sport maktabi, kollej va oliygohlarning zallarini noolimpiya sport turlari klublariga bepul berish tartibini joriy etish topshiriqlari berildi.
Vazirlik va viloyat hokimlari yoshlarning 43 foizi (6 milliondan ortiq) ommaviy sport bilan muntazam shugʻullanishini taʼminlash boʻyicha zarur choralar koʻrishi shartligi koʻrsatildi.

Yoshlarni sportga qamrab olish darajasi oshiriladi

Prezident yoshlarning sport maktablari bilan qamrovini 1,3 baravarga oshirib, 520 ming nafarga yetkazish vazifasini qoʻydi.
Bundan tashqari, 69 ta tumandagi sport maktablarida kamida 20 ta, 47 tasida 15 ta, qolgan 91 tasida 10 ta olimpiya sport turlariga tayyorlashni yoʻlga qoʻyish topshirildi.
Yil yakunigacha 508 ta mahallada koʻp funktsiyali sport maydonchalarini qurishga koʻrsatma berildi.
“Yil yakuniga qadar 6 million nafar yoshlarni ommaviy sport bilan qamrab olish – bu siyosat”, - deydi prezident.
Mirziyoyev tuman-shahar hokimlari va sektor rahbarlari ommaviy sportni rivojlantirish boʻyicha ishlarni jadallashtirishi kerakligi va bu borada soʻrov doimiy va qattiq boʻlishini qayd etib oʻtdi.
Sportchilarni professional tayyorlash boʻyicha tizim joriy etiladi
Unga koʻra:
kollejlar har bir viloyatda olimpiya va paralimpiya sport turlariga tayyorlash markazi sifatida tashkil etiladi;
markazlar huzurida 5-9-sinflar uchun Olimpiya maktablari, 10-11-sinflar va 1-2-kurslar uchun Olimpiya va paralimpiya kollejlari boʻladi;
bolalar va oʻsmirlar sport maktabida yaxshi natija koʻrsatgan yoshlar Olimpiya maktabiga qabul qilinib, taʼlim oladi va chuqurlashtirilgan sport bilan shugʻullanadi;
ixtisoslashgan sport maktablari bitiruvchilari kollejlarga 1-kursga qabul qilinib, tayyorgarlikning uzluksiz tizimi yaratiladi;
Sport vazirligi huzurida ilgʻor trener va xorijiy ekspertlardan iborat Murabbiylar kengashi tashkil etilib, musobaqalarda eng yuqori natijaga erishgan sportchilarni kollejlarga saralab oladi;
kollej bitiruvchilari Oliy sport mahorati institutiga qabul qilinadi.

Umumrespublika sport musobaqalari “tuman – viloyat – respublika” zanjiri asosida tashkil etiladi

Bundan buyon birlamchi saralash bosqichidan oʻtmagan sportchilar viloyat va respublika bosqichida ishtirok etmaydi. Milliy terma jamoalarga barcha bosqich musobaqalarida ishtirok etib gʻolib yoki sovrindor boʻlgan yoshlar saralab olinadi.
Har yili mahalla va muassasalar jamoalari ishtirokida koʻp bosqichli Hokim kubogi tashkil qilinadi.
Shuningdek, xalqaro tajriba va standartlar asosida sport turlari boʻyicha milliy chempionatlar oʻtkazish tartibi ishlab chiqiladi.
Mutasaddilarga quyidagi topshiriqlar berildi:
- olimpiya sport turlari boʻyicha sportchilarni jismoniy va ruhiy tayyorlash, ularni sogʻlom ovqatlantirish dasturlarini ishlab chiqish;
- kelgusi oʻquv yilidan boshlab Jismoniy tarbiya va sport universitetida sport diyetologiyasi, muhandisligi va kardiomashgʻulotlar, Tibbiyot akademiyasida sport meditsinasi va farmakologiyasi boʻyicha mutaxassislar tayyorlashni yoʻlga qoʻyish;
- yiliga kamida 20 nafar mahalliy trener, sport shifokori va boshqa mutaxassislarni xorijda malaka oshirish tizimini joriy etish.
Qolaversa, jismoniy tarbiya va sport ilmiy tadqiqotlar instituti faoliyatini tanqidiy koʻrib chiqib, uni takomillashtirish boʻyicha taklif kiritish topshirildi.
Maʼlumot uchun, shu yili sport sohasiga 2 trillion 300 milliard soʻm ajratilgan. Shundan 1 trillion 200 milliard soʻm sport taʼlim muassasalariga yoʻnaltirilgan.
Yozgi Osiyo oʻyinlari gʻoliblari qanday ragʻbatlantiriladi
Yangiliklar lentasi
0