Jamiyat

DTMga bitiruvchilarni attestatsiyadan oʻtkazish vakolati berilishi mumkin

© Agentstvo Prezidentskix obrazovatelnыx uchrejdeniyUcheniki prezidentskix shkol v Uzbekistane
Ucheniki prezidentskix shkol v Uzbekistane - Sputnik Oʻzbekiston, 1920, 26.07.2022
Obuna boʻlish
Yandex newsTelegram
Yangi tartibga koʻra, test sinovida yetarli ball toʻplay olmagan bitiruvchilar barcha oliy taʼlim tashkilotlariga oʻqishga qabul qilish tanlovida ishtirok eta olmaydi.
TOSHKENT, 26 iyul — Sputnik. Oʻzbekistonda 2024/2025 oʻquv yilidan boshlab umumiy oʻrta va oʻrta maxsus taʼlim tashkilotlari hamda kasb-hunar maktablari bitiruvchilari uchun yakuniy davlat attestatsiyasi Davlat test markazi (DTM) tomonidan oʻtkazilishi mumkin. Ushbu tartibni nazarda tutuvchi qaror loyihasi keng jamoatchilik muhokamasiga qoʻyildi.
Qaror loyihasini DTM ishlab chiqqan. Hujjat loyihasi qabul qilinsa, bitiruvchilar uchun majburiy uchta fan – ona tili, matematika va Oʻzbekiston tarixi fanlari hamda ikkitadan toʻrttagacha bakalavriat taʼlim yoʻnalishiga mos boʻlgan fanlardan test sinovi oʻtkaziladi.
Test sinovi natijalari boʻyicha bitiruvchilarga uch yil muddatga amal qiladigan elektron milliy sertifikat beriladi.
Hujjatda quyidagilar nazarda tutilgan:
Taʼlim dasturlarini toʻliq oʻzlashtirgan va oʻquv fanlaridan yil davomida qoniqarli baho olgan bitiruvchilar test sinoviga qoʻyiladi;
Test sinovi natijasi boʻyicha majburiy fanlardan minimal ball va undan yuqori ball toʻplagan bitiruvchilar yakuniy davlat attestatsiyasidan oʻtgan hisoblanadi;
Yil davomida test sinovini topshirib sertifikatga ega va uning bali Xalq taʼlimi vazirligi tomonidan belgilangan minimal oʻtish baliga mos kelgan bitiruvchilar tegishli fanlar boʻyicha yakuniy davlat attestatsiyasidan ozod etiladi;
Majburiy fandan minimal ball toʻplay olmagan, uzrli sababga koʻra test sinovida qatnasha olmagan bitiruvchilarga yakuniy davlat attestatsiyasi toʻliq yakunlanganidan ikki hafta oʻtgach ushbu fanlardan qayta test sinovini topshirish huquqi beriladi.
Qayta test sinovi natijalari boʻyicha yetarli ball toʻplay olmagan bitiruvchilar barcha oliy taʼlim tashkilotlariga oʻqishga qabul qilish tanlovida ishtirok eta olmaydi.
Ularga taʼlim tashkilotlari tomonidan tegishli taʼlimni tugatganligi haqida maʼlumotnoma beriladi hamda keyingi yil yakuniy davlat attestatsiyasida qayta test sinovini topshirish huquqi beriladi.
2023 yil 1 noyabrdan boshlab avvalgi yillarda taʼlim tashkilotlarini tugatgan abituriyentlar ham DTM tomonidan test sinovi oʻtkaziladi.
Abituriyentlarga yil davomida umumtaʼlim fanlaridan toʻlov asosida sertifikat olish uchun bir necha marotaba test sinovi topshirish huquqi beriladi.
Undiriladigan toʻlov:
Majburiy fanlar boʻyicha test sinovida qatnashish uchun – bazaviy hisoblash miqdorining 0,3 baravari miqdorida;
Mutaxassislik fanlar boʻyicha test sinovida qatnashish uchun har bitta fan boʻyicha – bazaviy hisoblash miqdorining 0,25 baravari miqdorida.
Quyidagilarga navbatdan tashqari yiliga bir marotaba toʻlovsiz test sinovida qatnashish imkoniyati beriladi:
“Ijtimoiy himoya yagona reyestri” axborot tizimida kam taʼminlangan oila sifatida roʻyxatga olingan oilalarning aʼzolari;
“Temir”, “Yoshlar”, “Ayollar” daftarlaridan biriga kiritilgan, nogironligi (I va II guruh) boʻlgan shaxslar;
Davlat qaramogʻida boʻlgan chin yetimlar.
Yangiliklar lentasi
0