Jamiyat

Xavfli suyak oʻsmasiga chalingan oʻsmirda noyob endoprotezlash amaliyoti bajarildi

© Sogʻliqni saqlash vazirligi matbuot xizmatimurakkab jarrohlik amaliyoti
murakkab jarrohlik amaliyoti - Sputnik Oʻzbekiston, 1920, 03.08.2022
Obuna boʻlish
NovostiTelegram
Rossiyalik va mahalliy shifokorlar hamkorligida xavfli suyak oʻsmasiga chalingan bolada endoprotezlash amaliyoti oʻtkazildi.
TOSHKENT, 3 avg — Sputnik. Oʻzbekistonda ilk bor xavfli suyak oʻsmasiga chalingan 14 yoshli oʻsmirda noyob endoprotezlash amaliyoti bajarildi. Bu haqda Sogʻliqni saqlash vazirligi matbuot xizmati xabar berdi.
Qayd etilishicha, Fargʻona viloyati Qoʻqon shahrida yashovchi 14 yoshli M.A.ga xavfli suyak oʻsmasi tashxisi qoʻyilgan. Shundan soʻng bemorning ota-onasi Respublika ixtisoslashtirilgan onkologiya va tibbiy radiologiya ilmiy-amaliy tibbiyot markaziga murojaat qilgan.
Kecha, 2 avgust kuni ushbu markazda ilk bor rossiyalik va mahalliy shifokorlar hamkorligida mazkur bemorda oʻsuvchi endoprotezlash amaliyoti oʻtkazilgan.
“Bu operatsiya chap son suyagi pastki uchligi sohasining rivojlangan xavfli oʻsma kasalligida tizza-boʻgʻinni endoprotezlash amaliyoti hisoblanadi. Toʻgʻri, shu paytga qadar yurtimizning qator tibbiyot muassasalarida shunga oʻxshash operatsiyalar oʻtkazilgan, biroq bugungi jarrohlik amaliyotining farqli tomoni, unda bemorga oʻrnatilgan endoprotez choʻzilish xususiyatiga ega. Yaʼni, uning afzalligi operatsiyadan keyin moslamani uzaytirish imkoni mavjud”, - deydi Respublika ixtisoslashtirilgan onkologiya va tibbiy radiologiya ilmiy-amaliy tibbiyot markazi boʻlim boshligʻi Tojiddin Mustafoyev.
Mutaxassislarning taʼkidlashicha, mazkur protez bemor organizmining oʻziga xosligidan kelib chiqqan holda individual tarzda tayyorlanadi. Qolaversa, moslama oʻsmir organizmi rivojlangani sari unga uygʻun ravishda oʻsib boradi. Natijada bola ulgʻayganda ham unda qoʻl yoki oyoqning kaltaligi kabi nuqsonlar kuzatilmaydi.
Maʼlumot uchun, soʻnggi paytlarda dunyo aholisi orasida onkologik xastaliklar bilan kasallanish koʻrsatkichi tobora ortib bormoqda. Maʼlumotlarga koʻra, 2030 yilga kelib, jahonda xavfli saraton kasalliklariga chalingan bemorlar soni 23,6 millionga yetadi.
Oʻzbekistonda ham bu kasallik tashxisi qoʻyilgan bemorlar soni kam emas. Xususan, mamlakatda har yili koʻplab insonlarda ushbu xastalik aniqlanadi. Ularning 900 nafardan ortigʻi xavfli suyak oʻsma kasalliklariga chalingan bemorlar boʻlib, bunda bolalarning ulushi 7 foizni tashkil qiladi.
Avvalroq, Oʻzbekistonga meʼda saratonini davolovchi rossiyalik jarrohlar kelgani, ular ishtirokida murakkab jarrohlik amaliyotlari oʻtkazilayotgani haqida xabar bergan edik. Shuningdek, rossiyalik olimlar saratonga qarshi zarari kam dori oʻylab topishgani ham aytilgandi.
Yangiliklar lentasi
0