TOShKENT, 10 yanv - Sputnik. Kecha Toshkentdagi Xalqaro press-klubda bo‘lib o‘tgan anjumanda O‘zbekiston Tashqi ishlar vazirining birinchi o‘rinbosari Ne’matov Ilhom To‘ychiyevich 2019-yilda O‘zbekistonga investitsiyalar asosan qaysi mamlakatlardan jalb qilinishi va qaysi sohalarga yo‘naltirilishi haqida so‘zlab berdi, Sputnik muxbiri xabariga asosan.
Vazir o‘rinbosari aytishiga qaraganda 2019-yilda O‘zbekiston iqtisodiyotiga eng yirik sarmoyalar Rossiya, Xitoy, Janubiy Koreya, Buyuk Britaniya va Polsha tomonidan kiritiladi.
Investitsiyalar jalb qilinadigan asosiy sohalar sifatida esa: energetika, yengil sanoat, maishiy xizmatlar, ta’lim va sog‘liqni saqlash sohalari belgilab olingan.
2019 yilda jalb qilish rejalashtirilgan to‘g‘ridan-to‘g‘ri xorijiy investitsiyalar miqdori 4,2 milliard miqdorida belgilangan. 2018-yilda jalb qilingan to‘g‘ridan – to‘g‘ri investitsiyalar miqdori 2,7 milliard dollarni tashkil qilgan edi.
Shuningdek vazir o‘rinbosari 2019-yilda uzoq muddatli loyihalarga ham katta e’tibor berilayotgani haqida so‘zlab berdi. Xususan yil davomida umumiy qiymati 22,3 milliard dollar bo‘lgan 264 ta uzoq muddatli loyihalar imzolash nazarda tutilgani aytib o‘tildi.
Yuqoridagi pespektiv investitsion loyihalar asosan yangi texnologiyalar olib kirish va Respublikaning Eksport salohiyatini oshirishga hamda turistlar sonini oshirishga qaratilgan.
