TOShKENT, 28 fev - Sputnik. O‘zbekiston Oliy Majlisi Senatining o‘n sakkizinchi yalpi majlisida nutq so‘zlagan Senat raisi Nig‘matulla Yo‘ldoshev maktab ta’limi tizimidagi, xususan maktab darsliklaridagi kamchiliklarga to‘xtaldi, deb xabar berdi Sputnik O‘zbekiston muxbiri.
Yo‘ldoshevning aytishicha, O‘zbekistonda vafot etgan mualliflarning darsliklarini qayta nashr qilish tartibi ham aniq belgilanmagan. Oqibatda darsliklar qator o‘zgartirishlar bilan marhumlar nomidan chop etilmoqda.
Masalan, 7-sinf "O‘zbekiston tarixi" darsligining muallifi Muhammadjonov 2016-yilda vafot etgan. Biroq, uning darsligidagi ahamiyat bering barcha mavzular qayta ishlangan, 6 mavzu yangidan yozilgan va darslik 2017-yilda marhum muallif nomidan qayta nashr etilgan.
Darsliklarning tender savdolari orqali g‘olib bo‘lgan turli nashriyotlarda nashr etilishi o‘quv materialining uzviyligi, uyg‘unligi va izchilligini, shuningdek, predmetlar aro aloqaning bog‘liqligini ta’minlashga to‘siq bo‘lmoqda.
Darsliklarda bir-birini rad etadigan xulosalar, mavhumliklar va nomuvofiqliklar ko‘payib ketganligi o‘qituvchi va o‘quvchilarni chalg‘itmoqda.
Aksariyat hollarda, darsliklar nazariyotchi olimlar tomonidan amaliyotdan yiroq holda yaratilmoqda. Ushbu jarayonga tajribali maktab o‘qituvchilari yetarli darajada jalb etilmayapti.
Bu kabi jiddiy xato va kamchiliklarni bartaraf etish ta’lim sifatini oshirishda muhim o‘rin tutadi, deb qayd etdi Senat raisi.
